ക്യാംപസുകളിലെ_നിയമവിരുദ്ധ_പ്രവർത്തനങ്ങൾ_തടയുന്നപവിധി_സ്വാഗതാർഹം

സ്‌കൂൾ, കോളേജ് കാമ്പസുകളിൽ പഠിപ്പുമുടക്ക്, കുത്തിയിരിപ്പ് സമരം, മാർച്ച്, ഘേരാവോ എന്നിവ നിരോധിച്ച കേരള ഹൈക്കോടതിയുടെ ഉത്തരവ് സ്വാഗതാർഹമാണ്. പഠന സമയങ്ങളിൽ

പണിമുടക്കാനോ തടസ്സപ്പെടുത്താനോ ആരെയും പ്രേരിപ്പിക്കരുത്. പക്ഷെ, കാമ്പസുകളിൽ നിയമവിരുദ്ധമായ പ്രവർത്തനങ്ങൾ പരിശോധിക്കാൻ ശരിയായ സംവിധാനം ഇല്ല എന്നതാണ് സത്യം.

അച്ചടക്കം ഉറപ്പാക്കേണ്ടത് കോളേജ് പ്രിൻസിപ്പലിന്റെ മാത്രം ഉത്തരവാദിത്വമായിമാറി. സഹ അധ്യാപകരുടെ പിന്തുണയില്ലാതെ വിദ്യാർത്ഥികളെ  നിയന്ത്രിക്കാൻ പ്രിൻസിപ്പലിന് ഒറ്റയ്ക്കാവില്ല. രാഷ്ട്രീയ ഇടപെടൽ മൂലം പല കലാലയങ്ങളിലും പ്രഥമാധ്യാപകന് മറ്റധ്യാപകരുടെ സഹായം ലഭിക്കാത്തത് അദ്ദേഹംത്തെ നിസ്സഹായനാക്കുന്നു.  ഇത്തരം സാഹചര്യങ്ങളിൽ പ്രിൻസിപ്പലിന്റെ കസേര കത്തിക്കുക, പ്രിൻസിപ്പലിന്റെ ശവസംസ്കാരം നടത്തുക, വിദ്യാർത്ഥികളുടെ സംഘടനകൾ ഹോസ്റ്റലുകളിൽ ആയുധങ്ങളും വെടിക്കോപ്പുകളും ശേഖരിക്കുക തുടങ്ങിയ ഹീനസംഭവങ്ങൾക്ക് കാമ്പസുകൾ സാക്ഷ്യം വഹിക്കുന്നു.

ഉന്നത വിദ്യാഭ്യാസ മന്ത്രി കെ ടി ജലീൽ ഇതിനകം തന്നെകോടതി വിധിക്കെതിരെ രംഗത്തെത്തിയിട്ടുണ്ട്. സ്വയം പ്രഖ്യാപിത താല്പര്യങ്ങളുള്ള  രാഷ്ട്രീയക്കാർ ഉൾപ്പെടുന്ന സർക്കാർ, കോടതി വിധിക്കെതിരെ നിയമങ്ങൾ തയ്യാറാക്കാൻ പോലും ധൈര്യപ്പെട്ടെന്നിരിക്കും.

ഈ സാഹചര്യത്തിൽ വിദ്യാർത്ഥികളുടെ പഠിപ്പുമുടക്ക് പരിശോധിക്കുന്നതിനായി ഒരു പോലീസ് നിരീക്ഷണം കോമ്പസുകളിൽ ക്രമീകരിച്ചാൽ  അത് വളരെ പ്രയോജനകരമായിരിക്കും. സ്കൂൾ-കോളേജുകളിലെ പ്രിൻസിപ്പൽമാർക്ക് വലിയ ആശ്വാസം ലഭിക്കുകയും ചെയ്യും.

കോടതി ഉത്തരവ് ലംഘിക്കുന്ന  വിദ്യാർത്ഥിയെ കണ്ടെത്തിയാൽ കർശന നടപടിയെടുക്കണം, കാമ്പസുകൾ വൃത്തികെട്ട രാഷ്ട്രീയത്തിൽ നിന്ന് മുക്തമാണെങ്കിൽ അത് വിദ്യാർത്ഥി സമൂഹത്തിന് വളരെ പ്രയോജനം ചെയ്യുമെന്ന കാര്യത്തിൽ തർക്കമില്ല്

. 

- കെ എ സോളമൻ

ബജറ്റിലെ സാഹിത്യ പെരുമഴ

ബജറ്റിലെ സാഹിത്യ പെരുമഴയ്ക്ക് ഒടുക്കമില്ല. കേരള ധനകാര്യമന്ത്രി തോമസ്ജി ഐസക്ക്ജി ബജറ്റ് സാഹിത്യത്തിൽ ഉൾപ്പെടുത്തി  പു.ക.സ കവികളെ വരെ നോബേൽ നിലവാരത്തിലേക്ക് ഉയർത്തിയിരിക്കുകയാണ്. ഭാരതത്തിൽ നിന്ന് സാഹിത്യത്തിൽ ആദ്യമായി നോബൽ സമ്മാനം നേടിയ രബീന്ദ്രനാഥ ടാഗോറിനൊപ്പം പിടികത്തിണ്ണയിൽ കുത്തിയിരുന്ന് പത്തു രൂപാ കപ്പലണ്ടിപ്പൊതി മൂന്നു മണിക്കൂറെടുത്തു തിന്നുതീർക്കുന്ന നാടൻ കവികൾ വരെ ഐസക് ജിയുടെ ബജറ്റ് സാഹിത്യത്തിൽ സ്ഥലം പിടിച്ചു.

നിരാശരായത് പ്രശസ്ത കവിയായ തോപ്രാംകുടി ശ്രീധരനും മപ്പിളപ്പാട്ടു കലാകാരൻ കോയാക്കുഞ്ഞു മുതലാളിയുയാണ്. ബജറ്റിനു പറ്റിയ പാകത്തിൽ ഈരണ്ടു വീതം സൃഷ്ടികൾ എഴുതി മന്ത്രിയുടെ കുർത്തായുടെ കീശയിൽ ഇട്ടു കൊടുത്തതാണ്. പക്ഷെ അവ ബജറ്റിൽ കണ്ടില്ല. കൂടെക്കൂടെ പോക്കറ്റിൽ കൈയ്യിടുന്ന സ്വഭാവം മന്ത്രിക്കുള്ളതിനാൽ പാട്ടെഴുതിയ കടലാസുകൾ കൈയുടക്കി നഷ്ടപ്പെട്ടതാകാം.

എന്നാലെന്ത്, ബജറ്റിൽ കവിതാ സാഹിത്യത്തിനു പഞ്ഞമില്ല. ബജറ്റിലെ പദ്ധതികളും കണക്കുകളും മുൻ വർഷ ബജറ്റുകളുടെ ആവർത്തന മെന്നതിനാൽ വൈവിധ്യാ മാർന്ന കാവ്യ കഥാപ്രസംഗത്തിനാണ് ഇക്കുറിയും പ്രാമുഖ്യം.

ആദ്യകാലങ്ങളിൽ ബജറ്റിൽ ഉൾപ്പെടുത്തിയിരുന്നത് പാത്തുമ്മയുടെ ആടും തകഴിയുടെ കയറും വൈലോപ്പിളളിയുടെ മാമ്പഴവുമൊക്കെ ആയിരുന്നെങ്കിൽ

ഇന്നത് കൂടുതലും കുട്ടിക്കവികളുടെയും വികടകവികളുടെയും കവിതകളാണ്. 2018-ൽ ഹൈസ്കൂൾ വിദ്യാർത്ഥിനി  സ്നേഹയാണു് കവിതയുമായി ബജറ്റിൽ കയറിതെങ്കിൽ  ഇത്തവണ ഊഴം വയനാട് മീനങ്ങാടി ഹയർ സെക്കൻഡറി സ്കൂളിലെ വിദ്യാർത്ഥി ദ്രുപത് ഗൗതമിനാണ്.

സത്രീകളുടെ സമഗ്രമുന്നേറ്റം ലക്ഷ്യം വെച്ചുളള കഴിഞ്ഞ കൊല്ലത്തെ ഷീ-ബജറ്റും ഇക്കൊല്ലത്തെ "അമ്മായി അമ്മ" ബജറ്റും മലയാള സാഹിത്യകാരികളുടെ രചനകളാൽ സംപുഷ്ഠം

അതെന്തായാലും ബജറ്റിലെ മഹാത്തായ സാഹിത്യ രചന നടത്തിയിരിക്കുന്നത് മന്ത്രി തോമസ്ജി ഐസക് ജി തന്നെയാണ്. കുട്ടനാട് ഉപതെരഞ്ഞെടുപ്പിനു മുന്നോടിയായി ജോസ്മോനെ പ്രീതിപ്പെടത്താൻ അപ്പൻ മാണിയുടെ 5 കോടി രൂപയുടെ പ്രതിമയാണത്. ഗുജറാത്തിലെ 3000 കോടി പ്രതിമയിൽ ഓപ്പൺ ഡിഫക്കേഷൻ നടത്തുന്ന കാക്കകൾ കൂട്ടത്തോടെ ഇങ്ങോട്ടു പറക്കുമോ എന്നതാണ് നാട്ടാരുടെ സംശയം.

കെ എ സോളമൻ

സുപ്രീം കോടതിയിൽ വിശ്വാസമില്ലേ?

കേരളത്തിലെ പ്രതിപക്ഷ നേതാവ് രമേശ് ചെന്നിത്തലയ്ക്ക് കോൺഗ്രസ് പാർട്ടി ഉന്നതരുടെ കൈകൊണ്ട് തലയ്ക്കൊരു കിഴുക്കു കിട്ടിയെന്നു തോന്നുന്നു. അതുകൊണ്ടാണ് ഗവർണർ ആരിഫ് മുഹമ്മദ് ഖാനെ അമിത് ഷായുടെ ഏജന്റായി ആരോപിക്കുന്നത്. മുഖ്യമന്ത്രി പിണറായി വിജയനുമായി ഖാൻ സഖ്യത്തിലാണെന്നും ചെന്നിത്തല കണ്ടെത്തിയിരിക്കുന്നു.  സർക്കാരും ഗവർണറും തമ്മിലുള്ള അവിശുദ്ധ ബന്ധം  തുറന്നുകാട്ടുന്നത് ഉടൻ കോടതിയിലെത്തുന്ന ലാവ്ലിൻ കേസിൽ നിന്ന് തലയൂരാനുള്ള  പിണറായിയുടെ തന്ത്രമാണെന്നും  ചെന്നിത്തല. 

ചെന്നിത്തലയും പിണറായിയും തമ്മിലായിരുന്നു ഇക്കാലമത്രയും  അവിശുദ്ധ ബന്ധം. ആരിഫ് മുഹമ്മദ്ഖാന്റെ വരവോടെ അത് അവസാനിച്ചുവെന്നത് ശ്രദ്ധേയമാണ് 

 ലാവ്‌ലിൻ കേസിൽ നിന്ന് രക്ഷപ്പെടാൻ മോഡിയെയും ഷായെയും വശീകരിക്കാനുള്ള തന്ത്രമാണ് ഖാൻ-പിണറായി നെക്സസ് എന്ന് ചെന്നിത്തല കണ്ടെത്തിയത് സംശയാസ്പദമാണ്. ഈ സാഹചര്യത്തിൽ ലാവ്‌ലിൻ കേസ് കോടതിയിൽ കേൾക്കുന്ന ജഡ്ജിമാരാണോ  മോദിയും ഷായും എന്നതും  ചെന്നിത്തലയ്ക്ക് സുപ്രീം കോടതിയിലുള്ള വിശ്വാസം നഷ്ടപ്പെട്ടോ എന്നതുമാണ്പ്രസക്തമായ ചോദ്യങ്ങൾ.

കെ എ സോളമൻ

കരയരുത് പ്ളീസ്

മരടിലെ ഫ്‌ളാറ്റുകള്‍ തകരുന്നത് വേദനയോടെയാണ് ഉടമകള്‍ കണ്ടത്;

ചിലർ വിതുമ്പി, ചിലർ കരഞ്ഞു.

വിതുമ്പാനും കരയാനും എന്തിരിക്കുന്നു സഹോദരി സഹോദരന്മാരെ? .നിങ്ങൾക്ക് വേണ്ടി പങ്കിടാൻ ഞങ്ങൾ നാട്ടുകാർക്കു കണ്ണീരില്ല്. അനധികൃത നിർമ്മിതി എന്നറിഞ്ഞിട്ടും  60 ലക്ഷത്തിന്റെ ഫ്ളാറ്റ് 3-4 ലക്ഷം റേറ്റിന് നിങ്ങൾ വാങ്ങി. നിങ്ങൾക്കു തയ്യറാക്കി ന ൾ കിയ ഡോക്കുമെന്റിൽ ഇതാണ് റേറ്റ് എന്നാണ് വാർത്ത. അപ്പോൾ ഓരോ കച്ചവടത്തിലും നിങ്ങളുടെ ലാഭം
56-57 ലക്ഷം രൂപ. ടാക്സ് അടക്കേണ്ട തുകയിൽ നിങ്ങൾ വൻ ലാഭം കൊയ്തു.

ബാങ്കിൽ നിന്നെടുത്ത 60 ലക്ഷം ലോൺ തിരിച്ചടക്കേണ്ട, കിട്ടാക്കടം ഭൂഷണമാക്കിയ ബാങ്കുകൾ ലോൺ എഴുതിത്തള്ളുമ്പോൾ അതും നിങ്ങൾക്കു ലാഭം.  കോടതി വിധി പ്രകാരമുള്ള  കോമ്പൻസേഷൻ മറ്റൊരു 25 ലക്ഷം ഉടൻ കൈയ്യിലെത്തുകയും ചെയ്യും.
അനധികൃത ഫ്ളാറ്റിൽ 10 വർഷം ലക്ഷ്യറി ലൈഫ് നടത്തിയ ലാഭം വേറെ. അങ്ങനെ ആകെ എത്ര ലക്ഷം ലാഭമുണ്ടാക്കിയെന്ന് നിങ്ങൾ ആലോചിച്ചു നോക്കു. ഫ്ളാറ്റ് കച്ചവടത്തിൽ നിങ്ങളുടെലാഭം കോടി കവിഞ്ഞില്ലെങ്കിലേ അത്ഭുതപ്പെടേണ്ടതുള്ളു. പിന്നെന്തിനാണ് ചാനൽ കാമറയ്ക്കു മുമ്പിൽ നിങ്ങൾ മോങ്ങിക്കാണിക്കുന്നത് ?

രാജ്യത്തെ നിയമ വ്യവസ്ഥയ്ക്ക് കരുത്തുണ്ടെന്നു തെളിയിക്കാൻ സഹായിച്ചതിന്റെ പേരിൽ നിങ്ങൾ സന്തോഷിക്കുകയല്ലേ വേണ്ടത്?

കെ എ സോളമൻ

ജനവിരുദ്ധ സമരം

സർട്രേഡ് യൂണിയനുകajas  അഖിലേന്ത്യാ പൊതു പണിമുടക്ക് സംസ്ഥാനത്തെ സാധാരണ ജീവിതത്തെ സ്തംഭിപ്പിച്ച കേരള സമരം മാത്രമാണ്. സംസ്ഥാനത്തെ ഇടയ്ക്കിടെ ഒരു ദിവസം പിന്നോട്ട് കൊണ്ടുപോകുന്നത് കേരളത്തിൽ ഒരു പതിവാണ്. രാജ്യത്തെ മറ്റ് സംസ്ഥാനങ്ങളെ ഈ പൊതു പണിമുടക്ക്  ബാധിക്കുകയോ അവിടത്തെ ജനങ്ങൾ ഇതേക്കുറിച്ച് കേൾക്കുകയോ ഉണ്ടായില്ല.  ട്രേഡ് യൂണിയനുകൾ സംസ്ഥാനത്തെ ടൂറിസം മേഖലയെയും ശബരിമല തീർത്ഥാടനത്തെയും പൊതു പണിമുടക്കിൽ നിന്ന് ഒഴിവാക്കിയെന്ന് പറയുന്നത് പരിഹാസ്യമാണ്. എല്ലാ കടകളും അടഞ്ഞുകിടക്കുമ്പോൾ ഒരു തീർത്ഥാടകനോ വിനോദസഞ്ചാരിയോ സംസ്ഥാനം സന്ദർശിക്കാൻ ധൈര്യപ്പെടില്ല. സംസ്ഥാന പൊതു പണിമുടക്ക് സർക്കാർ ജീവനക്കാർക്ക് ടിവിക്ക് മുന്നിൽ ലഘുഭക്ഷണവും കുപ്പിയുമായി വീട്ടിൽ ഉല്ലസിക്കാനുള്ള ഉത്സവമാണ്, അവരുടെ ഒരുദിവസത്തെ ശമ്പളം സർക്കാർ പൂർണ്ണമായും നല്കും. തൊഴിലാളികൾ, കാർ-ഓട്ടോ ഡ്രൈവർമാർ, മത്സ്യ കച്ചവടക്കാർ, മേസ്തരിമാർ, ലോട്ടറി വിൽപ്പനക്കാർ, രോഗികൾ, ദിന വേതനക്കാർ  എന്നിവർക്കാണ് നഷ്ടം. പണിമുടക്കിൽ പങ്കെടുക്കാത്തവർക്ക് പോലീസ് സുരക്ഷയുമില്ല.

കേന്ദ്രസർക്കാരിന്റെ ജനവിരുദ്ധ നയങ്ങളിൽ പ്രതിഷേധിച്ചാണ് തങ്ങൾ സമരത്തിൽ പങ്കെടുക്കുന്നുവെന്ന് ട്രേഡ് യൂണിയനുകൾ. വാസ്തവത്തിൽ സംസ്ഥാന സർക്കാർ സ്പോൺസർ ചെയ്ത ട്രേഡ് യൂണിയനുകളുടെ പണിമുടക്ക് ജനവിരുദ്ധമാണ്.

കെ എ സോളമാൻ

ഹിസ്റ്ററികോൺഗ്രസിന്റെ ഹിസ്റ്ററി

#

കണ്ണൂർ സർവകലാശാലയിൽ നടന്ന 80-ാമത് ഇന്ത്യൻ ഹിസ്റ്ററി കോൺഗ്രസിന്റെ ഉദ്ഘാടന വേളയിൽ കേരള ഗവർണർക്കെതിരെ നടത്തിയ പ്രതിഷേധം കേരളമനസ്സിനെ വ്രണപ്പെടുത്തി. ഈ ഒറ്റ സംഭവം മതി കേരളത്തിലെ ക്രമസമാധാനനില അപകടത്തിലാണെന്ന് ചൂണ്ടിക്കാണിക്കാൻ.

വാസ്തവത്തിൽ, ഗവർണർ തന്റെ പ്രസംഗം ആരംഭിച്ചത് രാഷ്ട്രീയത്തെക്കുറിച്ചല്ല ചരിത്രത്തെക്കുറിച്ച് സംസാരിക്കാനാണ്. എന്നാൽ മതഭ്രാന്ത് ബാധിച്ച ചില പ്രതിനിധികൾ അദ്ദേഹത്തെ എതിർത്തു. ഇത് തികച്ചും അപലപനീയമാണ്. ചരിത്ര കോൺഗ്രസ് പൂർണ്ണ പരാജയമായി അവസാനിക്കുകയും ചെയ്തു.

ഒരു ജനാധിപത്യ രാഷ്ട്രത്തിൽ ഗവർണർക്ക് അഭിപ്രായം പങ്കുവെയ്ക്കാൻ എല്ലാ അവകാശങ്ങളുമുണ്ട്. ഭരണകൂട പിന്തുണയോടു കൂടിയ പൂർണ അസഹിഷ്ണുതയാണ് ഗവർണർ പങ്കെടുത്ത പരിപാടി അലങ്കോലമാക്കിയതെന്ന് സിസിടിവി ദൃശ്യങ്ങൾ കാണിക്കുന്നു. ഹിസ്റ്ററി കോൺഗ്രസ്സിന്റെ ഹിസ്റ്ററിക്ക് തന്നെ നാണക്കേടുണ്ടാക്കിയ സംഭവത്തിൽ   വിശദീകരണം നൽകേണ്ടതിന്റെ ഉത്തരവാദിത്വം കേരളം ഭരിക്കുന്ന മുഖ്യമന്ത്രിക്കുണ്ട്

കെ എ സോളമാൻ

മണ്ണുതിന്ന കുഞ്ഞുങ്ങൾ!

തിരുവനന്തപുരം കൈതമുക്കിൽ കുഞ്ഞുങ്ങൾ  മണ്ണുതിന്ന സംഭവം ഇത്രകണ്ട് ആഘോഷിക്കേണ്ടതില്ലായിരുന്നു. വിശന്നാൽ കുഞ്ഞുങ്ങൾ എന്തും എടുത്തു തിന്നും. പള്ളിയിൽ കർത്താവിന്റെ രൂപക്കൂടിനു മുന്നിൽ കത്തിച്ച വെച്ചമെഴുകു തിരികൾ ഉരുകി വീണുണങ്ങിയത്  തിന്ന് വിശപ്പടക്കാൻ നോക്കിയ കുട്ടികളെയും അറിയാം. അതു പണ്ട്.

 

മണ്ണുതിന്ന കുഞ്ഞുങ്ങളുടെ അമ്മ എത്ര സത്യസന്ധമായാണ് കാര്യങ്ങൾ പറഞ്ഞത്. ചാനൽ റിപ്പോർട്ടുമാരുടെ ചോദ്യങ്ങൾക്കു് വളരെ കൃത്യമായി അവർ മറുപടി നൾകി. വിശപ്പുണ്ട്, ദാരിദ്യമാണ് എന്നൊക്കെ, ഭർത്താവിന്റെ ഉപദ്രവവും. ഇതു ഒറ്റപ്പെട്ട സംഭവമല്ല. മദ്യപിച്ചു ലക്കുകെടുന്ന ആളുകളുള്ള ഇത്തരം ഒത്തിരി ദരിദ്ര കുടുംബങ്ങൾ കേരളത്തിലുണ്ട്. കുട്ടികളടെ,  കുടുംബത്തിന്റെ പട്ടിണി മാറ്റാൻ സർക്കാരിനു, സമൂഹത്തിനു എന്തു ചെയ്യാനാവും എന്നതാണ് പ്രസക്തം. പട്ടിണി നിർമ്മാർജനം എന്നത് മദ്യനിരോധനം പോലെ അപ്രസക്തമാകുന്നിടത്താണ് മണ്ണുതിന്ന കുഞ്ഞുങ്ങൾ ചോദ്യചിഹ്നങ്ങളാകുന്നത്.

-- കെ എ സോളമൻ