#ഗ്യാനേഷ്_കുമാറിനെതിരായ_വിജിലൻസ്_അന്വേഷണം_രാഷ്ട്രീയ_പകപോക്കലിന്റ_പുതിയമുഖം.
ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെതിരെ അദ്ദേഹം കേരളത്തിൽ പൊതുമരാമത്ത് സെക്രട്ടറി ആയിരുന്ന കാലത്തെ അഴിമതി ആരോപണങ്ങൾ വീണ്ടും കുത്തിപ്പൊക്കി വിജിലൻസ് അന്വേഷണം ആരംഭിച്ച കേരള സർക്കാരിന്റെ നടപടി സംശയാസ്പദവും രാഷ്ട്രീയ പ്രേരിതമാണ്. ഇതുമായി ബന്ധപ്പെട്ട പരാതികളിൽ വിജിലൻസ് നേരത്തെ വർഷങ്ങളോളം അന്വേഷണം നടത്തിയിരുന്നു. ആരോപണങ്ങൾ തെളിയിക്കാൻ മതിയായ തെളിവുകൾ ലഭിക്കാത്തതിനെത്തുടർന്ന് 2012-ൽ കേസുകൾ അവസാനിപ്പിക്കുകയും ചെയ്തതാണ്.
അങ്ങനെയിരിക്കെ, ഏകദേശം രണ്ടു പതിറ്റാണ്ട് പഴക്കമുള്ള ആരോപണങ്ങൾ ഇപ്പോൾ വീണ്ടും സജീവമാക്കുന്നതിന്റെ അടിയന്തര സാഹചര്യം എന്താണ്? പുതിയ തെളിവുകൾ ലഭിച്ചിട്ടുണ്ടെങ്കിൽ അവ നിയമാനുസൃതമായി പരിശോധിക്കട്ടെ. എന്നാൽ നേരത്തെ അവസാനിപ്പിച്ച അന്വേഷണം പുതിയ രാഷ്ട്രീയ സാഹചര്യത്തിൽ വീണ്ടും പൊടിതട്ടിയെടുക്കുന്നത് സ്വാഭാവികമായും സംശയമുയർത്തും. ആരോപണം ഉന്നയിക്കപ്പെടുന്നതും കുറ്റം തെളിയിക്കപ്പെടുന്നതും രണ്ടാണ് എന്ന അടിസ്ഥാന നിയമതത്വം ഭരണകൂടം മറക്കരുത്.
ദേശീയതലത്തിൽ ഗ്യാനേഷ് കുമാറിനെതിരെ കോൺഗ്രസും പ്രതിപക്ഷ ഇണ്ടി സഖ്യവും പാറ്റാ പാർട്ടിയും ചേർന്നുനടത്തുന്ന പ്രക്ഷോഭങ്ങളുടെ പശ്ചാത്തലത്തിൽ കേരളത്തിലെ കോൺഗ്രസ് നേതൃത്വത്തിലുള്ള സർക്കാർ വിജിലൻസ് അന്വേഷണവുമായി മുന്നോട്ടുവന്നത് രാഷ്ട്രീയ പ്രതികാരത്തിന്റെ ഭാഗമാണെന്ന സംശയം ബലപ്പെടുത്തുന്നു. ഭരണഘടനാപരമായ സ്വതന്ത്ര സ്ഥാപനമായ തിരഞ്ഞെടുപ്പ് കമ്മീഷന്റെ തലവനെതിരായ രാഷ്ട്രീയ സമരത്തിന് സംസ്ഥാന ഭരണസംവിധാനത്തെ ഉപയോഗിക്കുന്ന സാഹചര്യം ജനാധിപത്യത്തിന് ഭൂഷണമല്ല.
തിരഞ്ഞെടുപ്പ് കമ്മീഷണറുടെ തീരുമാനങ്ങളോട് വിയോജിപ്പുണ്ടെങ്കിൽ അതിനെ ചോദ്യം ചെയ്യാൻ ഭരണഘടനാപരവും നിയമപരവുമായ മാർഗങ്ങളുണ്ട്. അതിനുപകരം പൂട്ടിക്കെട്ടിയ പഴയ ആരോപണങ്ങൾ രാഷ്ട്രീയ ആയുധമാക്കുന്നത് ജനാധിപത്യ സ്ഥാപനങ്ങളുടെ അന്തസ്സിനെയും അന്വേഷണ ഏജൻസികളുടെ വിശ്വാസ്യതയെയും ഒരുപോലെ ബാധിക്കും. പുതിയ തെളിവുകളുടെ അടിസ്ഥാനത്തിൽ നിഷ്പക്ഷമായ അന്വേഷണം നടത്തുന്നതിനെ ആരും എതിർക്കേണ്ടതില്ല; എന്നാൽ രാഷ്ട്രീയ താൽപര്യങ്ങൾക്കുവേണ്ടി വിജിലൻസിനെ ഉപയോഗിക്കുന്ന പ്രവണത ശക്തമായി അപലപിക്കപ്പെടണം..
ഇതാണ് സർക്കാരിൻറെ പോളിസി എങ്കിൽ ഇന്ന് അധികാരത്തിലിരിക്കുന്ന മന്ത്രിമാരും സെക്രട്ടറിമാരും ഭാവിയിൽ അനേകം വിജിലൻസ് അന്വേഷണത്തെ നേരിടാനാണ് സാധ്യത.
-കെ എ സോളമൻ
