#എൽപിഎസ് റ്റി #സമരവും #രാഷ്ട്രീയഇരട്ടത്താപ്പും
ആശാവർക്കാരുടെ ന്യായമായ ആവശ്യങ്ങൾക്കനുസരിച്ച് അവരുടെ പ്രതിഫലം വർധിപ്പിക്കാൻ മടിച്ചവരാണ് ഇന്ന് വളർമതിയുടെയും കൂട്ടരുടെയും സമരത്തിന് പിന്തുണയുമായി രംഗത്തെത്തിയിരിക്കുന്നത് . ആശാവർക്കാരുടെ പ്രതിഫലവർധനവിന്റെ കാര്യത്തിൽ സാമ്പത്തിക പരിമിതികൾ പറഞ്ഞവർക്ക് ഇപ്പോൾ വളർമതിയുടെ കാര്യത്തിൽ അതൊന്നും പ്രശ്നമല്ല!
വളർമതിയുടെ സഹനസമരത്തിന് മുഖ്യമന്ത്രി പിണറായി വിജയൻ നൽകുന്ന പരിഗണനയും രാഷ്ട്രീയ പിന്തുണയും കാണുമ്പോൾ, ഈ സമരത്തിന് പിന്നിൽ കേവലം തൊഴിൽപ്രശ്നം മാത്രമാണോ അതോ രാഷ്ട്രീയ താൽപര്യങ്ങളാണോ എന്ന ചോദ്യം ഉയരുന്നു. പിണറായി 3.0 അധികാരത്തിൽ വന്നാൽ വളർമതിക്ക് മന്ത്രിസ്ഥാനം ഉറപ്പ് എന്ന പരിഹാസം പോലും ഉയരുന്നുണ്ട്.
എന്നാൽ ഈ സമരത്തിലെ ഏറ്റവും പ്രധാനപ്പെട്ട ചോദ്യം ഇതാണ്: ഒഴിവില്ലാത്ത പൊതുവിദ്യാലയങ്ങളിൽ എങ്ങനെയാണ് പുതിയ നിയമനങ്ങൾ നടത്തുക? പി.എസ്.സി.യുടെ റാങ്ക് ലിസ്റ്റിൽ പേരുണ്ടെന്നതുകൊണ്ട് മാത്രം നിയമനത്തിന് അവകാശം ലഭിക്കില്ല. ഒഴിവുകൾ റിപ്പോർട്ട് ചെയ്യപ്പെടുകയും തസ്തികകൾ അനുവദിക്കപ്പെടുകയും വേണം. നിലവിലുള്ള 1:30 അധ്യാപക–വിദ്യാർഥി അനുപാതം 1:25 ആക്കണമെന്നതാണ് സമരക്കാരുടെ പ്രധാന ആവശ്യങ്ങളിലൊന്ന്.
കഴിഞ്ഞ വർഷം ഡിവിഷൻ നഷ്ടപ്പെട്ടതിനെത്തുടർന്ന് ഏകദേശം 600 അധ്യാപകരെ മറ്റ് ഒഴിവുകളിലേക്ക് ക്രമീകരിച്ചിട്ടുണ്ടെന്ന സമരക്കാരുടെ അവകാശവാദവും വാർത്തകളിലുണ്ട്. അത്തരം ക്രമീകരണങ്ങൾ നടക്കുമ്പോൾ പുതിയ ഒഴിവുകളുടെ എണ്ണം കുറയുന്നത് സ്വാഭാവികമാണ്. റാങ്ക് ലിസ്റ്റിന്റെ കാലാവധി നീട്ടണമെന്നോ പുതിയ വിജ്ഞാപനം മാറ്റിവയ്ക്കണമെന്നോ ആവശ്യപ്പെടാം; പക്ഷേ യഥാർഥത്തിൽ ഇല്ലാത്ത തസ്തികകൾ സൃഷ്ടിച്ച് എല്ലാവർക്കും നിയമനം നൽകാൻ സർക്കാരിന് കഴിയുമോ?
എയിഡഡ് സ്കൂളുകൾ ധാരാളമുള്ള സംസ്ഥാനത്ത് 1:25 അനുപാതം നടപ്പാക്കിയാൽ ഉണ്ടാകുന്ന സാമ്പത്തികവും ഭരണപരവുമായ പ്രത്യാഘാതങ്ങൾ കൂടി പരിശോധിക്കേണ്ടതുണ്ട്. ഉദ്യോഗാർഥികളോട് സഹതാപം കാണിക്കുന്നത് നല്ലതാണ്; എന്നാൽ നിയമനകാര്യത്തിൽ സഹതാപത്തേക്കാൾ പ്രധാനം യാഥാർത്ഥ്യത്തിനാണ്.
എൽ പിഎസ് റ്റി സമരക്കാരെ വെച്ച് സതീശൻ സർക്കാരിനെ അസ്ഥിരപ്പെടുത്താം എന്നത് പ്രതിപക്ഷ കക്ഷികളുടെ വ്യാമോഹം മാത്രം.
- കെ എ സോളമൻ
