#പിഎസ്സി #അഴിമതിയും #ഭരണകൂടവഞ്ചനയും
കേരള അഡ്മിനിസ്ട്രേറ്റീവ് സർവീസ് (കെ എ എസ്) ഉൾപ്പെടെയുള്ള ഉന്നത പരീക്ഷകളിൽ പോലും ക്രമക്കേടുകൾ നടന്നത് ലക്ഷക്കണക്കിന് ഉദ്യോഗാർത്ഥികളോടുള്ള ക്രൂരമായ ചതിയാണ്. കഴിഞ്ഞ ഒരു പതിറ്റാണ്ടുകാലമായി സംസ്ഥാനം ഭരിച്ച സർക്കാരുകളുടെയും മന്ത്രിമാരുടെയും മൂക്കിനു താഴെയാണ് ഇത്രയും വലിയ കെടുകാര്യസ്ഥതയും ജനവഞ്ചനയും അരങ്ങേറിയത്.
ഭരണപരമായ മേൽനോട്ടം വഹിക്കേണ്ട മന്ത്രിമാരും, പിഎസ്സിയുടെ സുതാര്യത കാത്തുസൂക്ഷിക്കേണ്ട ഉന്നത ഉദ്യോഗസ്ഥരും കാട്ടിയ നിസ്സംഗതയും പരോക്ഷമായ പങ്കാളിത്തവും മാപ്പർഹിക്കാത്ത കുറ്റമാണ്. നിസ്സഹായരായ ഉദ്യോഗാർത്ഥികളുടെ കഠിനാധ്വാനത്തെക്കാൾ സ്വന്തക്കാർക്കും രാഷ്ട്രീയ സ്വാധീനമുള്ളവർക്കും പിൻവാതിൽ നിയമനം ഉറപ്പാക്കാൻ ഉദ്യോഗസ്ഥ-ഭരണ നേതൃത്വം ഒത്തുകളിച്ചുവെന്നത് ജനാധിപത്യ സംവിധാനത്തിന് വലിയ നാണക്കേടാണ്.
ഈ തട്ടിപ്പുകൾക്ക് പിന്നിൽ പ്രവർത്തിച്ച രാഷ്ട്രീയ യജമാനന്മാരെയും, ഫയലുകളിൽ ഒപ്പുവെച്ച് ക്രമക്കേടുകൾക്ക് കൂട്ടുനിന്ന ഉന്നത ഉദ്യോഗസ്ഥരെയും നിയമത്തിന് മുന്നിൽ കൊണ്ടുവരാൻ അടിയന്തരവും ശക്തവുമായ അന്വേഷണം അനിവാര്യമാണ്.
കേവലം താഴ്ന്ന റാങ്കിലുള്ള ജീവനക്കാരെ മാത്രം ബലിയാടാക്കി യഥാർത്ഥ സൂത്രധാരന്മാരായ മന്ത്രിമാരെയും ഐഎഎസ് ഉദ്യോഗസ്ഥരെയും സംരക്ഷിക്കാനുള്ള നീക്കങ്ങൾ അനുവദിക്കാൻ പാടില്ല.
പരീക്ഷാ നടത്തിപ്പിലെ സുരക്ഷാ വീഴ്ചകൾ, ചോദ്യപേപ്പർ ചോർച്ച, മാർക്ക് തിരിമറി എന്നിവ സമഗ്രമായി അന്വേഷിച്ച് കുറ്റവാളികൾക്ക് മാതൃകാപരമായ ശിക്ഷ ഉറപ്പാക്കണം. എങ്കിൽ മാത്രമേ തകർന്നടിഞ്ഞ പിഎസ്സിയുടെ വിശ്വാസ്യത വീണ്ടെടുക്കാനും, വിയർപ്പൊഴുക്കി പഠിച്ച യഥാർത്ഥ യോഗ്യതയുള്ള ഉദ്യോഗാർത്ഥികൾക്ക് നീതി ഉറപ്പാക്കാനും സാധിക്കുകയുള്ളൂ.
- കെ എ സോളമൻ
No comments:
Post a Comment