അപൂർവ്വ പ്രതിഭാസം

#അപൂർവ്വപ്രതിഭാസം

ഒരു സിനിമാനടൻ ബിജെപി വിടുന്നു എന്ന് പറയുമ്പോൾ കേരളം നടുങ്ങേണ്ടതാണ്, പക്ഷേ ദേവൻ്റെ കാര്യത്തിൽ അതുണ്ടായില്ല. കാരണം ദേവൻ ബിജെപിയിൽ ഉണ്ടായിരുന്നു എന്നത് തന്നെ പലർക്കും ഒരു 'ബ്രേക്കിംഗ് ന്യൂസ്' ആണ്.

അദ്ദേഹത്തിൻറെ  കെപിപി എന്ന പാർട്ടി ബിജെപിയിൽ ലയിച്ചപ്പോൾ, ലയിക്കാൻ ആരെങ്കിലും ഉണ്ടായിരുന്നോ എന്ന ചോദ്യം ഇപ്പോഴും പ്രസക്തം. ഒരുപക്ഷേ ദേവൻ തനിച്ചാണ്  ലയനം നടത്തിയതെങ്കിൽ ഒരാൾ ചേരുന്നതും ഒരു പാർട്ടി ലയിക്കുന്നതും ഒരേ സമയം സംഭവിച്ച അപൂർവ രാഷ്ട്രീയ സംഭവം മാത്രം.

രാജി പ്രഖ്യാപിക്കാൻ വീട്ടിലെ ബാൽക്കണിയിൽ നിന്നാൽ മതിയായിരുന്നു, പക്ഷേ ദേവൻ അതിന് കണിച്ചുകുളങ്ങര വരെ യാത്ര ചെയ്തു, പത്മഭൂഷൺ വെള്ളാപ്പള്ളി നടേശൻ്റെ സാന്നിധ്യത്തിൽ പ്രഖ്യാപിക്കുകയായിരുന്നു. ബിജെപിയുമായി യാതൊരു ബന്ധവുമില്ലാത്ത ഒരാളുടെ മുന്നിൽ ബിജെപി വിടുന്നത് പ്രഖ്യാപിക്കുന്നതിലെ യുക്തി മനസ്സിലാക്കാൻ ഒരു രാഷ്ട്രീയ തന്ത്രജ്ഞൻ്റെ  സഹായം വേണ്ടിവരും. അഞ്ചു മാസം മുൻപേ എടുത്ത തീരുമാനം ഇപ്പോൾ പ്രഖ്യാപിച്ചു എന്നും കത്ത് ഉടൻ കൈമാറും എന്നും പറയുന്നു.  അതായത്, രാജിക്കും അതിൻ്റെ ഔദ്യോഗിക രേഖയ്ക്കും ഇടയിലുള്ള ദൂരം, ബിജെപിയിലേക്കുള്ള ദേവൻ്റെ യഥാർത്ഥ സ്വാധീനത്തിൻ്റെ ദൂരത്തോളം തന്നെ വരും.

ആരോഗ്യം ക്ഷയിച്ച്, എല്ലുന്തി പല്ലുകൾ കൊഴിഞ്ഞ കഴുതയുടെ അവസ്ഥയാണ് ഇപ്പോൾ ദേവൻ്റേത്. നടൻ ഭീമൻ രഘുവിനെയും ആ ഗണത്തിൽ പെടുത്താം

- കെ എ സോളമൻ