രാഷ്ട്രീയ നേതാക്കൾക്ക് ഉത്തരവാദിത്വമില്ലേ?

#രാഷ്ട്രീയ_നേതാക്കൾക്ക് #ഉത്തരവാദിത്വമില്ലേ?

ഒരുമിച്ചിരുന്ന് എം.എൽ.എമാരുടെ ശമ്പളം വർധിപ്പിക്കാനും മുന്തിയ ഹോട്ടലുകളിൽ പന്തിഭോജനം നടത്താനും ഡൽഹിയിൽ ചെന്ന് പരസ്പരം കെട്ടിപ്പിടിക്കാനും ഇണ്ടി സഖ്യത്തിലെ നേതാക്കൾക്ക് യാതൊരു മടിയുമില്ല. എന്നാൽ അവരുടെ അണികൾക്കിടയിൽ, പ്രത്യേകിച്ച് വിദ്യാർത്ഥി-യുവജന സംഘടനകൾക്കിടയിൽ, രാഷ്ട്രീയ ശത്രുതയും സംഘർഷവും വളർത്തുന്നത് എന്തിനാണ്? 

പരസ്പരം സഹകരിച്ച് അധികാരം പങ്കിടാനും വ്യക്തിപരമായ സൗഹൃദം നിലനിർത്താനും കഴിയുന്ന നേതാക്കൾക്ക് സ്വന്തം അണികളെ സമാധാനപരമായ രാഷ്ട്രീയ പ്രവർത്തനത്തിന് പ്രേരിപ്പിക്കാൻ കഴിയാത്തത് എന്തുകൊണ്ടാണ്? നേതാക്കൾ തമ്മിൽ സൗഹൃദവും അണികൾക്കിടയിൽ ശത്രുതയും എന്ന ഈ ഇരട്ടത്താപ്പ് രാഷ്ട്രീയ കാപട്യത്തിന്റെ ഏറ്റവും വലിയ ഉദാഹരണമാണ്.

ഉന്നതവിദ്യാഭ്യാസ മന്ത്രിയും കോൺഗ്രസ് നേതാവുമായ റോജി എം. ജോൺ പങ്കെടുത്ത എറണാകുളം മഹാരാജാസ് കോളേജിലെ കോൺവൊക്കേഷൻ ചടങ്ങ് സി.പി.എമ്മിന്റെ വിദ്യാർത്ഥി സംഘടന അലങ്കോലമാക്കിയ സംഭവത്തിൽ അതിന്റെ നേതൃത്വം വ്യക്തമായ മറുപടി പറയണം. വിദ്യാർത്ഥികളുടെ അക്കാദമിക നേട്ടങ്ങളെ ആദരിക്കേണ്ട ഒരു ഔദ്യോഗിക ചടങ്ങിനെ രാഷ്ട്രീയ പോരാട്ടത്തിന്റെ വേദിയാക്കാൻ ആരാണ് ഇവരെ പ്രേരിപ്പിച്ചത്?

 അഭിപ്രായവ്യത്യാസങ്ങളുണ്ടെങ്കിൽ അത് ജനാധിപത്യപരമായി പ്രകടിപ്പിക്കാനുള്ള എത്രയോ മാർഗങ്ങളുണ്ട്. അതിന് പകരം യുവാക്കളെ തെരുവിൽ ഏറ്റുമുട്ടാൻ വിട്ടുകൊടുക്കുന്ന നേതാക്കളുടെ രാഷ്ട്രീയ ധാർമികതയാണ് ചോദ്യം ചെയ്യപ്പെടേണ്ടത്. സ്വന്തം സൗകര്യങ്ങൾക്കും രാഷ്ട്രീയ ലാഭങ്ങൾക്കും വേണ്ടി കൈകോർക്കുന്ന നേതാക്കൾക്ക് അണികളുടെ സമാധാനവും ഭാവിയും സംരക്ഷിക്കാനുള്ള ഉത്തരവാദിത്വമില്ലേ? നേതാക്കളേ, നിങ്ങൾക്ക് നാണമില്ലേ? 

അടുത്തകൊല്ലം അല്ലെങ്കിൽ അതിനടുത്ത കൊല്ലം ഇതുപോലെ കോൺവെക്കേഷനിൽ പങ്കെടുത്ത് ഡിഗ്രി സർട്ടിഫിക്കറ്റ് സ്വീകരിക്കേണ്ട വിദ്യാർത്ഥികളാണ് അവരുടെ സീനിയേഴ്സിൻ്റെ മാതാപിതാക്കളെ പോലും  ഞെട്ടിപ്പിച്ച അതിക്രമത്തിന് തയ്യാറായത്

സ്വന്തം രാഷ്ട്രീയ താൽപര്യങ്ങൾക്കായി യുവജനങ്ങളെ പരസ്പരം പോരടിപ്പിക്കുന്ന ഇത്തരം രാഷ്ട്രീയ നാടകം ഇനിയെങ്കിലും അവസാനിപ്പിച്ചുകൂടേ?

-കെ എ സോളമൻ

എംഎൽഎമാരുടെ ശമ്പള വർദ്ധന

#എംഎൽഎ_മാരുടെ #ശമ്പളവർദ്ധന

​നാടിന്റെ സാമ്പത്തിക പ്രതിസന്ധിയും സാധാരണക്കാരുടെ പട്ടിണിയും എംഎൽഎമാർക്ക് പ്രശ്നമല്ല. തൊഴിലില്ലായ്മ പ്രശ്നവും ബജറ്റുമൊക്കെ ചർച്ച ചെയ്യാൻ നിയമസഭയിൽ കയ്യാങ്കളി നടത്തുന്ന ഭരണ-പ്രതിപക്ഷ എം.എൽ.എമാർക്ക് ശമ്പളവും ആനുകൂല്യങ്ങളും കൂട്ടുന്ന കാര്യത്തിൽ ഒരേ മനസാണ്!

 "ജനങ്ങളെ സേവിച്ച് കഷ്ടപ്പെട്ട്" കോടീശ്വരന്മാരായി മാറിയ നമ്മുടെ ജനപ്രതിനിധികൾക്ക് നിലവിൽ കിട്ടുന്ന എഴുപതിനായിരവും മറ്റ് ആനുകൂല്യങ്ങളും തികയുന്നില്ലത്രേ! മണ്ഡലത്തിൽ നേരെചൊവ്വെ നടക്കാൻ കാശില്ലെന്ന് പറഞ്ഞ് കണ്ണീരൊഴുക്കുന്ന ഇവർക്ക് വേണമെങ്കിൽ രാജിവെച്ച് വല്ല തൊഴിലുറപ്പ് പണിക്കും പൊയ്ക്കൂടെ? 

ഈ തുച്ഛമായ കാശിനും അതിനേക്കാൾ കുറഞ്ഞ തുകയ്ക്കും നാടിനെ സേവിക്കാൻ തയാറുള്ള ലക്ഷക്കണക്കിന് ചെറുപ്പക്കാർ പുറത്ത് ജോലിയില്ലാതെ തെണ്ടിത്തിരിയുമ്പോഴാണ്, കൈയിൽ കാശില്ലാത്ത സർക്കാർ പ്രതിനിധികൾ ലക്ഷങ്ങളുടെ സാമ്പത്തിക പാക്കേജ് സ്വയം പാസാക്കി എടുക്കുന്നത്.. ഇതൊന്നും തികയാഞ്ഞിട്ടാവും സഭയിലിരുന്ന് ഗയിം കളിക്കാൻ  എം.എൽ.എയ്ക്ക്ഐപാഡുകൾ വാങ്ങാൻ  6.71 കോടിയുടെ സമ്മാനമായി വേറെയും നൽകുന്നത്!

​ഇതുപോലെയുള്ള പ്രവൃത്തിയും സ്വന്തം കീശ വീർപ്പിക്കലും തുടർന്നാൽ, കേരളത്തിലെ യുവാക്കൾ ഇനി വല്ല ഐ.എ.എസിനോ ഡോക്ടർ പണിക്കോ പഠിക്കാൻ പോകുന്ന മണ്ടത്തരം കാണിക്കില്ല. നേരെ വല്ല രാഷ്ട്രീയ പാർട്ടിയിലുംകേറി എംഎൽഎയോ മന്ത്രിയോ പി.എസ്.സി അംഗമോ കോർപ്പറേഷൻ ചെയർമാനോ ആകാൻ തുനിഞ്ഞിറങ്ങും. 

ദിവസക്കൂലിക്ക് രാഷ്ട്രീയപണി ചെയ്യുന്ന ചെറുപ്പക്കാരുടെ കാഴ്ച നമ്മുടെ നാട്ടിൽ പുത്തരി അല്ല. ലോകത്ത് ഏറ്റവും കൂടുതൽ ആളുകൾ പണിയെടുക്കാതെ തിന്നു ജീവിക്കുന്ന 'ഫുൾടൈം രാഷ്ട്രീയക്കാരുടെ' നാടായി കേരളം പണ്ടേമാറി. അത് കുറേക്കുറി ശക്തമാകുന്ന  മനോഹരമായ കാഴചയാണ് വരാൻ പോകുന്നത്.. 

ജനങ്ങളിൽ നിന്ന് അധിക നികുതിപ്പണം പിരിച്ചെടുത്ത് പാതിരാത്രിയിൽ ബില്ല് പാസാക്കി പണം പങ്കിട്ടെടുക്കാൻ ഒരു തർക്കവുമില്ലാത്ത ഈ കുറവൻ- കുറത്തി രാഷ്ട്രീയ കൂട്ടുകെട്ട് കാണുമ്പോൾ, ജനം ആകാശത്തേക്ക് നോക്കി എന്ത് ചെയ്യണമെന്ന് അറിയാതെ കണ്ണും തള്ളിയിരിക്കും. നിയമത്തിന്റെ പിൻബലത്തിൽ സാധാരണക്കാരന്റെ

കീശയിലെ അവസാനചില്ലിക്കാശും അധികാരത്തിൽ ഇരിക്കുന്നവർ അപഹരിച്ചെടുക്കും

- കെ എ സോളമൻ

ഗവർണറുടെ ശുപാർശ

#ഗവർണ്ണറുടെ #ശുപാർശ  #ശരിയും #അഭിനന്ദനാർഹവും

​ലക്ഷക്കണക്കിന് അഭ്യസ്തവിദ്യരായ ഉദ്യോഗാർത്ഥികളുടെ അവസാന പ്രതീക്ഷയാണ് പബ്ലിക് സർവീസ് കമ്മീഷൻ.  അങ്ങനെയുള്ള ഒരു സ്ഥാപനത്തെ സ്വജനപക്ഷപാതത്തിന്റെയും അഴിമതിയുടെയും കേന്ദ്രമാക്കി മാറ്റി പി എസ് സി ചെയർമാനും അംഗങ്ങളും.  ഇവരെ പിരിച്ചുവിടണമെന്ന് ആവശ്യപ്പെട്ട് ഗവർണർ രാജേന്ദ്ര വിശ്വനാഥ് അർലേകർ രാഷ്ട്രപതിക്ക് ശുപാർശ നൽകിയത് തികച്ചും അഭിനന്ദനാർഹമായ നടപടിയാണ്. 

സാധാരണക്കാരായ യുവാക്കളുടെ ഭാവി വച്ച് പന്താടുന്ന ഇത്തരം ജീർണ്ണതകൾക്കെതിരെ ഒരു സംസ്ഥാനത്തലവൻ എടുത്ത ഈ ശക്തമായ നിലപാട് ജനാധിപത്യ മൂല്യങ്ങളെ സംരക്ഷിക്കുന്നതാണ്.  

ഭരണഘടനാപരമായി നോക്കുകയാണെങ്കിൽ, ആർട്ടിക്കിൾ 317  പ്രകാരം ഒരു സംസ്ഥാന പബ്ലിക് സർവീസ് കമ്മീഷനിലെ ചെയർമാനെയും അംഗങ്ങളെയും നീക്കം ചെയ്യാനുള്ള അധികാരം സുപ്രീം കോടതിയുടെ അന്വേഷണ റിപ്പോർട്ടിന്റെ അടിസ്ഥാനത്തിൽ  രാഷ്ട്രപതിയിലാണ് നിക്ഷിപ്തമായിരിക്കുന്നത്. പി എസ് സി യുമായി ബന്ധപ്പെട്ട് ഗുരുതരമായ ആരോപണങ്ങൾ ശ്രദ്ധയിൽപ്പെട്ട സാഹചര്യത്തിൽ ഉചിതമായ അന്വേഷണത്തിനും നടപടിക്കുമായി വിഷയം രാഷ്ട്രപതിയുടെ ശ്രദ്ധയിൽപ്പെടുത്തിയ ഗവർണ്ണറുട നടപടി തികച്ചും നിയമവിധേയവും ഭരണഘടനാപരമായി പൂർണ്ണമായും നിലനിൽക്കുന്നതുമാണ്.

 നീതിനിഷേധത്തിനെതിരെയുള്ള ഈ ഉറച്ച കാൽവെപ്പ് ജനങ്ങളുടെ വിശ്വാസ്യത വീണ്ടെടുക്കാൻ സഹായിക്കും. . മുൻ സർക്കാരുമായി ബന്ധപ്പെട്ട ക്രമക്കേടുകളെ ന്യായീകരിക്കാൻ നിൽക്കാതെ  ഗവർണറുടെ ശുപാർശയ്ക്ക് എല്ലാ പിന്തുണയും നൽകാൻ യുഡിഎഫ് സർക്കാർ തയ്യാറാവണം.

-കെ എ സോളമൻ

ഗവർണറുടെ അടുക്കള

#ഗവർണറുടെ #അടുക്കളയിൽ #എഐസിസിക്ക് #എന്തുകാര്യം ?

സ്വന്തം വീട്ടിലെ അടുക്കളയിൽ എന്ത് പാകം ചെയ്യണം എന്ന് തീരുമാനിക്കുന്നത് ഗൃഹനാഥനാണ് അല്ലാതെ നാട്ടുകാരനല്ല    ലോക്ഭവനിലെ ചീനച്ചട്ടിയിൽ കടുക് പൊട്ടുന്നതിനു മുൻപേ ഡൽഹിയിൽ നിന്ന് ഒരു പ്രതിഷേധം പൊട്ടിയത് കണ്ട് പാചകക്കാർ പോലും അമ്പരന്നു. സത്യപ്രതിജ്ഞ ചെയ്തു ചുമതലയേറ്റ ഗവർണർ സ്വന്തം ഭവനത്തിലെ തീൻമേശയിൽ എന്ത് വിളമ്പണമെന്ന് നിശ്ചയിക്കുന്നത് ഏതു വകുപ്പ് പ്രകാരമാണ് "കാവി അജണ്ട" ആകുന്നത്? ഇങ്ങനെ പോയാൽ ഏതെങ്കിലും വീട്ടിൽ ഇന്ന് സാമ്പാർ വെച്ചാൽ അതും കോൺഗ്രസ് ജനറൽ സെക്രട്ടറി കെ സി യുടെ  അനുമതിക്കായി അയക്കേണ്ടി വരുമോ എന്നാണ് ജനങ്ങളുടെ ആശങ്ക. 

എഐസിസി ജനറൽ സെക്രട്ടറി പദവിയിൽ ഇരിക്കുന്ന ഒരാൾക്ക് രാജ്യത്തെ എത്രയോ വലിയ പ്രശ്നങ്ങൾ ഉള്ളപ്പോൾ ഒരു അടുക്കളയിലെ ഉപ്പുമാവിൽ വരെ ഇടപെടാൻ സമയം കിട്ടുന്നു എന്നത് കർമ്മകുശലതയുടെ തെളിവായി കാണാം, പക്ഷേ മുൻഗണനയുടെ കാര്യത്തിൽ ഒരു പുനർവിചിന്തനം വളരെ നല്ലതാണ്.

ഇനി ഭക്ഷണസ്വാതന്ത്ര്യത്തിന്റെ കാര്യം എടുത്താൽ  ലോക്ഭവനിൽ മീനും ഇറച്ചിയും വേവാത്തതുകൊണ്ട് ഒരാളുടെയും സ്വാതന്ത്ര്യം ഇടിഞ്ഞു വീഴാനിടയില്ല. ഈ പരിഷ്കാരം ശിലാശാസനമല്ല, ഗവർണറുടെ കാലാവധി തീരുന്നതുവരെ മാത്രം. നാളെ വരുന്ന ഗവർണർക്ക് ദം ബിരിയാണി മാത്രം മതിയെങ്കിൽ അതിനും ജനാധിപത്യം വഴിയൊരുക്കും.

ലോക്ഭവനിൽ  നോൺവെജ് കഴിക്കാൻ മുട്ടി നിൽക്കുന്ന  ജീവനക്കാർക്ക് ഗേറ്റിനു പുറത്തു ചൂടുള്ള തട്ടുകടകൾ കാത്തിരിപ്പുണ്ടല്ലോ. കേരളത്തിന്റെ മുക്കിലും മൂലയിലും ബീഫ് ഫ്രൈയും മീൻ വറുത്തതും വിളമ്പുന്ന മോഡേൺ ഫുട്ട് കോർട്ടുകൾ ഉള്ളപ്പോൾ, ലോക്ഭവൻ അടുക്കളയെ ഒരു പ്രത്യയശാസ്ത്ര യുദ്ധക്കളമായി ചിത്രീകരിക്കുന്നത് അറിവില്ലായ്മ കൊണ്ടാണോ അതോ അറിഞ്ഞുകൊണ്ടുള്ള കളിയാണോ എന്നേ ഇനി അറിയാനുള്ളൂ. ബിരിയാണി കിട്ടാത്തത് കൊണ്ട് ലാവണം മാറ്റാൻ ഉദ്ദേശിക്കുന്ന ജീവനക്കാർക്ക് അതിനുള്ള സൗകര്യം നിഷേധിക്കാനും ഇടയില്ല.

ജീവനക്കാരുടെ ഭക്ഷണാവകാശം യഥാർഥത്തിൽ നിയന്ത്രിക്കപ്പെടുന്നുണ്ടെങ്കിൽ അതേക്കുറിച്ച് വസ്തുതകളുടെ അടിസ്ഥാനത്തിൽ വിമർശിക്കാം. പക്ഷേ, ഒരു അടുക്കളയിലെ മെനുവിനെ മുഴുവൻ സംഘപരിവാർ രാഷ്ട്രീയത്തിന്റെ വിളമ്പുപാത്രമാക്കി ആക്ഷേപിക്കേണ്ടതില്ല. രാഷ്ട്രീയത്തിൽ വിമർശനം നല്ലതാണ്; എന്നാൽ ഓരോ അടുക്കളയിലും വിഘടനരാഷ്ട്രീയത്തിന്റെ അടുപ്പുകല്ല് കൂട്ടാൻ ശ്രമിക്കരുത്.

-കെ എ സോളമൻ

.

ഓഹരി വിപണിയുടെ തകർച്ച

#ഓഹരിവിപണിയുടെ #തകർച്ച.

ഇന്ത്യൻ ഓഹരി വിപണി നേരിടുന്ന തുടർച്ചയായ ഇടിവ് സാധാരണ നിക്ഷേപകരുടെ സമ്പാദ്യത്തിന് കനത്ത ഭീഷണിയായി. ഏതാനും ആഴ്ചകൾക്കു മുമ്പ് നിക്ഷേപിച്ച ഒരു ലക്ഷം രൂപ ഇപ്പോൾ ആര ലക്ഷമായി. ഈ പോക്ക് തുടർന്നാൽ പണം പൂർണയായും നഷ്ടപ്പെടുമോ എന്ന ആശങ്കയിലാണ് ചെറുകിട നിക്ഷേപകർ. , 

 ഓഹരി വിപണിയുടെ തകർച്ചയെ വെറുമൊരു താൽക്കാലിക ഏറ്റക്കുറച്ചിലായി തള്ളിക്കളയാനാവില്ല. വിപണിയിൽ പണം നിക്ഷേപിക്കാൻ ജനങ്ങളെ പ്രോത്സാഹിപ്പിക്കുന്നവർ, നഷ്ടം സംഭവിക്കുമ്പോൾ അവരുടെ ഉത്തരവാദിത്വത്തെക്കുറിച്ചും ചിന്തിക്കണം. 

ജിയോ പ്ലാറ്റ്‌ഫോംസിന്റെ ഓഹരി ഇഷ്യുവിന്റെ വിജയം മാത്രം ചൂണ്ടിക്കാട്ടി വിപണിയുടെ ആരോഗ്യസ്ഥിതി വിലയിരുത്തുന്നതു ശരിയല്ല. ഒരു ഇഷ്യുവിന് ലഭിക്കുന്ന പ്രതികരണവും മൊത്തം വിപണിയുടെ പ്രകടനവും രണ്ടാണ്. നിക്ഷേപകരുടെ ആവേശം വിപണിയുടെ യഥാർഥ ശക്തിയുടെ തെളിവായി അവതരിപ്പിക്കുമ്പോൾ, അവരുടെ പണം അപകടത്തിലാകുന്ന സാഹചര്യങ്ങളിൽ എന്തുകൊണ്ട് അതേ ഗൗരവം കാണിക്കുന്നില്ല എന്ന ചോദ്യം പ്രസക്തമാണ്.

പണ്ട് ഓഹരി വിപണിയിൽ വലിയ ഇടിവുണ്ടാകുമ്പോൾ ധനമന്ത്രിയുടെ ഇടപെടലുകളും പൊതുജനങ്ങൾക്ക് ആശ്വാസം നൽകുന്ന പ്രഖ്യാപനങ്ങളും പ്രതീക്ഷിക്കാമായിരുന്നു. പി. ചിദംബരം ധനമന്ത്രിയായിരുന്ന കാലത്തെ വിപണി ഇടപെടലുകൾ അതിന് ഉദാഹരണമായി ചൂണ്ടിക്കാട്ടാം. എന്നാൽ ഇന്ന് വിപണിയുടെ തകർച്ചയ്ക്കിടയിൽ ധനമന്ത്രാലയത്തിന്റെ പ്രതികരണവും എൽ.ഐ.സി. പോലുള്ള പൊതുമേഖലാ ധനകാര്യ സ്ഥാപനങ്ങളുടെ ഇടപെടലും സംബന്ധിച്ച് കൂടുതൽ വ്യക്തത ജനങ്ങൾ പ്രതീക്ഷിക്കുന്നു. 

ഓഹരി വിപണിയെ കൃത്രിമമായി താങ്ങിനിർത്തുക എന്നതല്ല സർക്കാരിന്റെ ചുമതല; മറിച്ച് സുതാര്യതയും നിക്ഷേപക സംരക്ഷണവും ഉറപ്പാക്കുകയും വിപണിയിലെ അനാവശ്യ ചാഞ്ചാട്ടങ്ങളുടെ കാരണങ്ങൾ വ്യക്തമാക്കുകയും ചെയ്യുക എന്നതാണ്. 

വിപണിയുടെ വളർച്ചയുടെ നേട്ടങ്ങൾ ആഘോഷിക്കുന്നവർ തകർച്ചയുടെ സമയത്ത് നിക്ഷേപകരുടെ ആശങ്കകൾക്കും മറുപടി നൽകണം. അല്ലാത്തപക്ഷം, ദീർഘകാല സമ്പാദ്യം പ്രതീക്ഷിച്ച് ഓഹരി വിപണിയിലെത്തുന്ന സാധാരണക്കാരന് അത് നിക്ഷേപത്തിനുള്ള വേദിയല്ല, മറിച്ച് സമ്പാദ്യം നഷ്ടപ്പെടുന്ന  ചൂതാട്ടക്കളമാണെന്നു തോന്നും. 

പണം കളയാനുണ്ടെങ്കിൽ ഇന്ത്യൻ ഓഹരി വിപണിയിലേക്ക് ഇറങ്ങൂ എന്നതായി ഇന്ത്യൻ സ്റ്റോക്ക് മാർക്കറ്റിൻ്റെ  നിലവിലെ അവസ്ഥ

-കെ എ സോളമൻ

കിഫ്ബി എന്ന കടബാധ്യത

#കിഫ്ബി: വികസനത്തിന്റെ മറവിലെ കടബാധ്യത!

കേരളത്തിന്റെ അടിസ്ഥാനസൗകര്യ വികസനത്തിന് പണം കണ്ടെത്തുക എന്ന ലക്ഷ്യത്തോടെ രൂപീകരിച്ച കിഫ്ബി ഇന്ന് സംസ്ഥാനത്തിന്റെ സാമ്പത്തിക ബാധ്യതകളെക്കുറിച്ചുള്ള ഗൗരവമായ ചോദ്യങ്ങൾ ഉയർത്തുകയാണ്. മുൻ ധനമന്ത്രി തോമസ് ഐസക്കിന്റെ സാമ്പത്തിക ആസൂത്രണത്തിന്റെ ഭാഗമായി നടപ്പാക്കിയ ഈ സംവിധാനം വഴി സമാഹരിച്ച വായ്പകൾ തിരിച്ചടയ്ക്കേണ്ടത് ആത്യന്തികമായി സംസ്ഥാനത്തിന്റെ വരുമാനത്തിൽനിന്നാണ്. കിഫ്ബിയുടെ വായ്പകൾ സംസ്ഥാനത്തിന്റെ യഥാർഥ കടബാധ്യതയിൽനിന്ന് വേറിട്ടുനിർത്താനാവില്ലെന്നത് കംപ്ട്രോളർ ആൻഡ് ഓഡിറ്റർ ജനറലിന്റെ റിപ്പോർട്ടുകളും വ്യക്തമാക്കുന്നു. 

തിരിച്ചടവിന്റെ വ്യക്തമായ ആസൂത്രണവും സാമ്പത്തിക സുതാര്യതയും ഉറപ്പാക്കാതെ കടമെടുക്കുന്നത് ഭാവിതലമുറയുടെ സാമ്പത്തിക സുരക്ഷയെ ബാധിക്കും. 2,150 കോടി രൂപയുടെ മസാല ബോണ്ട് ഉൾപ്പെടെയുള്ള വായ്പകളുടെ പലിശയും തിരിച്ചടവും സംബന്ധിച്ച കണക്കുകൾ പൊതുജനങ്ങൾക്ക് വ്യക്തമായി ബോധ്യപ്പെടണം. മസാല ബോണ്ട് ഇടപാടിൽ ക്രമക്കേടോ അഴിമതിയോ നടന്നിട്ടുണ്ടെങ്കിൽ അതിന് ഉത്തരവാദികളായവരെ കണ്ടെത്തേണ്ടത് അന്വേഷണത്തിലൂടെയും തെളിവുകളിലൂടെയുമാണ്.

കിഫ്ബിയുടെ കൈവശം 30,000 കോടി രൂപയുണ്ടെന്ന തോമസ് ഐസക്കിന്റെ അവകാശവാദവും മുഖ്യമന്ത്രി വി.ഡി. സതീശൻ ഉന്നയിച്ച കണക്കുകളും തമ്മിലുള്ള വ്യത്യാസം ഇപ്പോൾ പുതിയ വിവാദത്തിന് വഴിവെച്ചിരിക്കുകയാണ്. 2026 മാർച്ച് 31-ലെ കണക്കനുസരിച്ച് കിഫ്ബിയുടെ ആകെ നീക്കിയിരിപ്പ് 10,633 കോടി രൂപയാണെന്നും അതിൽ 4,128 കോടി രൂപ സർക്കാർ ട്രഷറി കോർപ്പസ് ഫണ്ടാണെന്നും ശേഷിക്കുന്ന നിക്ഷേപം 6,521 കോടി രൂപയാണെന്നുമാണ് മുഖ്യമന്ത്രി സതീശൻ ചൂണ്ടിക്കാട്ടിയത്. ഇതിനു പിന്നാലെ ഐസക് തന്റെ ഫേസ്ബുക്ക് പോസ്റ്റിലെ കണക്ക് തിരുത്തിയതായി മാധ്യമങ്ങൾ റിപ്പോർട്ട് ചെയ്തു. 

ഈ സാഹചര്യത്തിൽ, 30,000 കോടി രൂപയുടെ അവകാശവാദത്തിന്റെ അടിസ്ഥാനമെന്തെന്നും കിഫ്ബിയുടെ യഥാർഥ സാമ്പത്തിക നിലയെന്തെന്നും വിശദമായ കണക്കുകളിലൂടെ വ്യക്തമാക്കേണ്ട ബാധ്യത ഐസക്കിനുണ്ട്.

 പിണറായി വിജയന്റെ നേതൃത്വത്തിൽ നടപ്പാക്കിയ കിഫ്ബി മാതൃകയും ഐസക്കിന്റെ സാമ്പത്തിക തീരുമാനങ്ങളും രാഷ്ട്രീയ വാദപ്രതിവാദങ്ങൾക്കപ്പുറം സ്വതന്ത്രവും സുതാര്യവുമായ പരിശോധനയ്ക്ക് വിധേയമാകണം. 

വികസനത്തിന്റെ പേരിൽ വായ്പയെടുക്കാം; പക്ഷേ ആ വായ്പയുടെ കണക്കും തിരിച്ചടവിന്റെ ഉത്തരവാദിത്വവും ജനങ്ങളിൽനിന്ന് മറച്ചുവയ്ക്കാനാവില്ല. കിഫ്ബിയിലെ 30000 കോടി കണ്ടെത്താൻ കുർത്തയുടെ കീറിയ പോക്കറ്റിൽ കൈയ്യിട്ടു നോക്കുകയല്ല വേണ്ടത്.

-കെ എ സോളമൻ

സ്വാഭാവിക പ്രതികരണം

#കച്ചവടക്കാരുടേത് സ്വാഭാവിക പ്രതികരണം.

ന്യൂഡൽഹിയിലെ കൊണാട്ട് പ്ലേസിൽ വ്യാപാരികളും സിജെപി പ്രതിഷേധക്കാരും തമ്മിൽ ശക്തമായ തർക്കങ്ങളും പ്രതിഷേധങ്ങളും കയ്യേറ്റങ്ങളും നടക്കുന്നതായി വാർത്ത.  തുടർച്ചയായ സമരങ്ങളും സുരക്ഷാ നിയന്ത്രണങ്ങളും കാരണം തങ്ങളുടെ കച്ചവടം പൂർണ്ണമായി തകരുകയാണെന്ന് ചൂണ്ടിക്കാണിച്ചാണ് കൊണാട്ട് പ്ലേസിലെ വ്യാപാരികൾ രംഗത്തിറങ്ങിയത്.  ജീവിതമാർഗം ആരെങ്കിലും മനപൂർവം മുടക്കിയാൽ അതിനെതിരെ പ്രതികരിക്കുക തന്നെ വേണം. 

ഉത്സവ സീസൺ  ആരംഭിച്ച ഈ സമയത്ത് തുടർച്ചയായി ഉണ്ടാകുന്ന സമര കോലാഹലങ്ങൾ കാരണം കൊണാട്ട് പ്ലേസിലെ കച്ചവടത്തിൽ വലിയ ഇടിവുണ്ടായതായി വ്യാപാരികൾ പറയുന്നു. 90 ശതമാനത്തിലധികം-ബിസിനസ്സ് നഷ്ടം നേരിട്ടതായി ന്യൂഡൽഹി ട്രേഡേഴ്സ് അസോസിയേഷൻ ഭാരവാഹികൾ വ്യക്തമാക്കി. 

സമരങ്ങൾ പ്രഖ്യാപിക്കുമ്പോൾ ഡൽഹി പോലീസ് സുരക്ഷാ വേലികളും  ഗതാഗത നിയന്ത്രണങ്ങളും ഏർപ്പെടുത്തുകയും കടകൾ നേരത്തെ അടയ്ക്കാൻ നിർദ്ദേശിക്കുകയും ചെയ്യുന്നു. ഒന്നോ രണ്ടോ ദിവസത്തിന് പകരം ആഴ്ചകൾ നീണ്ടുനിൽക്കുന്ന സമരാഭാസം മൂലം ഉപഭോക്താക്കൾ ഇവിടേക്ക് വരുന്നത് തടയുകയും കച്ചവടത്തെ ബാധിക്കുകയും ചെയ്യും

നാഷണൽ ടെസ്റ്റിംഗ് ഏജൻസിയിലെ പരീക്ഷാ ക്രമക്കേടുകൾക്കെതിരെ പ്രതിഷേധവുമായി എത്തിയ പാറ്റപാർട്ടി  നേതാവു അഭിജിത്ത് ദീപ്കെയും കൂട്ടരും ദിവസവും ഓരോരോ ഇഷ്യൂ ഉയർത്തി ഡൽഹിയിലെ ക്രമസമാധാനം തകർക്കുകയാണ്. വിദേശ ഫണ്ടിംഗിലും ചാനൽ ഹൈപ്പിലും ആകൃഷ്ടരായ ജൻസികൾ, പ്രത്യേകിച്ചും കേരളത്തിൽ നിന്നുള്ളവർ, കച്ചവട മേഖലയായ കൊണാട്ട് പ്ലേസിനെ സമരവേദിയാക്കുന്നതിനെതിരെ കടുത്ത അമർഷത്തിലാണ് അവിടുത്തെ വ്യാപാരികൾ. അവരുടെ ചെറുത്തുനിൽപ്പ് അതുകൊണ്ടുതന്നെ  ഒരു സ്വാഭാവിക പ്രതികരണമായി കാണണം. 

-കെ എ സോളമൻ

അപലപിക്കപ്പെടണം

#നടപടി #അപലപിക്കപ്പെടണം 

പൊലീസ് ബാരിക്കേഡുകൾ ചാടിക്കടന്ന് ജന്തർ മന്തറിൽ പോലീസ് നിയന്ത്രണങ്ങൾ ലംഘിച്ച് പ്രവേശിച്ചതായി ആരോപിക്കപ്പെടുന്ന സിജെപി നേതാക്കളായ സൗരവ് ദാസ്, അശുതോഷ് റാങ്ക, അജിങ്ക്യ ഷിൻഡെ എന്നിവരുടെ നടപടികളെ ശക്തമായി അപലപിക്കേണ്ടതുണ്ട്. ഇന്ത്യ പോലുള്ള ഒരു ഭരണഘടനാ ജനാധിപത്യത്തിൽ, സമാധാനപരമായ പ്രതിഷേധത്തിനുള്ള അവകാശം അടിസ്ഥാനപരമാണ്, പക്ഷേ അത് ആരെയും നിയമത്തിന് മുകളിൽ പ്രതിഷ്ഠിക്കുന്നില്ല. 

പൊലീസ് ഉത്തരവുകൾ അവഗണിക്കുന്നതും ബാരിക്കേഡുകൾ മറികടക്കുന്നതും നിയന്ത്രിത പ്രതിഷേധ മേഖലയിലേക്ക് പ്രവേശിക്കുന്നതും ആക്ടിവിസത്തിന്റെ പേരിൽ മാത്രം ന്യായീകരിക്കാനാവില്ല. രാംലീല ഗ്രൗണ്ട്, ബുരാരി ഗ്രൗണ്ട്, സിബിഡി ഗ്രൗണ്ട് തുടങ്ങിയ ബദൽ വേദികൾ അധികാരികൾ അംഗീകൃത പ്രകടനങ്ങൾക്കായി നിശ്ചയിച്ചിട്ടുണ്ടെങ്കിൽ, പ്രതിഷേധ സംഘാടകർ നിർദ്ദിഷ്ട നടപടിക്രമങ്ങൾ പാലിക്കുകയും നിയമപരമായ മാർഗങ്ങളിലൂടെ വേണം നിയന്ത്രണങ്ങളെ വെല്ലുവിളിക്കാൻ.

നിയമവാഴ്ച ആക്ടിവിസ്റ്റുകൾക്കും രാഷ്ട്രീയ നേതാക്കൾക്കും സാധാരണ പൗരന്മാർക്കും ഒരുപോലെ ബാധകമായിരിക്കണം. പൊതു ഇടങ്ങളെ അതിന്റെ സ്വകാര്യ സ്വത്തായി കണക്കാക്കാനോ അതിന്റെ രാഷ്ട്രീയ ബോധ്യങ്ങൾ നിയമപരമായ പ്രത്യാഘാതങ്ങളിൽ നിന്ന് പ്രതിരോധം നൽകുന്നുവെന്ന് കരുതാനോ ഒരു സംഘടനയെയും അനുവദിക്കരുത്. പ്രത്യേകിച്ച് അസ്വസ്ഥതയുണ്ടാക്കുന്നത് ചില ആക്ടിവിസ്റ്റുകൾ അധികാരികളുമായി ഏറ്റുമുട്ടുകയും നിയന്ത്രണങ്ങൾ ലംഘിക്കുകയും ചെയ്യുന്ന പ്രവണതയാണ്.  അത്തരം പെരുമാറ്റം നിയമാനുസൃതമായ പ്രതിഷേധങ്ങളുടെ വിശ്വാസ്യതയെ ഇല്ലാതാക്കുകയും അനാവശ്യമായി സംഘർഷങ്ങൾ സൃഷ്ടിക്കുകയും ചെയ്യും. 

ഭരണഘടനാ മൂല്യങ്ങൾ സംരക്ഷിക്കുന്നുവെന്ന് അവകാശപ്പെടുന്ന ആക്ടിവിസ്റ്റുകൾ സർക്കാരിൽ നിന്ന് ആവശ്യപ്പെടുന്ന അതേ ഭരണഘടനാ നടപടിക്രമങ്ങളോട് ആദരവ് പ്രകടിപ്പിക്കാൻ തയ്യാറാകണം. 

കെ എ സോളമൻ

പ്രകോപനപരമായ അധിക്ഷേപം

#പ്രകോപനപരമായ #അധിക്ഷേപം

പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ, ആർ‌എസ്‌എസ് മേധാവി മോഹൻ ഭഗവത്, ദേശീയ സുരക്ഷാ ഉപദേഷ്ടാവ് അജിത് ഡോവൽ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ എന്നിവരെ "ഭീരുക്കൾ" എന്ന് വിളിക്കുന്നത് ഉത്തരവാദിത്തമുള്ള രാഷ്ട്രീയ നേതൃത്വത്തിന്റെ ലക്ഷണമല്ല . പ്രതിപക്ഷ നേതാവെന്ന നിലയിൽ രാഹുൽ ഗാന്ധി പൊതു സംവാദത്തിന്റെ അന്തസ്സ് ഉയർത്തിപ്പിടിക്കാനുള്ള ഉത്തരവാദിത്തം കാണിക്കണം. 

രാഷ്ട്രീയ വിയോജിപ്പ് ജനാധിപത്യത്തിന്റെ അനിവാര്യ സവിശേഷതയാണ്, എന്നാൽ വ്യക്തിപരമായ അധിക്ഷേപങ്ങളും പ്രകോപനപരമായ ഭാഷയും യുക്തിസഹമായ വാദങ്ങൾക്കും തെളിവുകൾക്കും  വിമർശനങ്ങൾക്കും പകരമാകില്ല. രാഹുൽ ഗാന്ധിയുടെ രാഷ്ട്രീയ ഏറ്റുമുട്ടൽ ഗുരുതരമായ അപമാനങ്ങളുടെയും നാടകീയ ആംഗ്യങ്ങളുടെയും പ്രകടനമാണ്. 

ഭരണത്തിലിരിക്കുന്നവരെ ആക്രമിക്കുന്നതിലൂടെ മാത്രമല്ല, വിശ്വസനീയമായ ബദലുകൾ അവതരിപ്പിക്കുന്നതിലൂടെയും, തെളിവുകൾ ഉപയോഗിച്ച് സർക്കാർ നയങ്ങളെ ചോദ്യം ചെയ്യുന്നതിലൂടെയും, വാക്കുകളും പ്രവൃത്തികളും തമ്മിലുള്ള സ്ഥിരത പ്രകടമാക്കുന്നതിലൂടെയും ഒരു പ്രതിപക്ഷ നേതാവ് പൊതുജന ബഹുമാനം നേടുന്നു. രാഹുൽ ഗാന്ധിയിൽ അങ്ങനെ ഒരു സ്വഭാവ ഗുണമില്ല.

വ്യക്തിപരമായ ആക്രമണങ്ങൾ വാർത്തകൾ സൃഷ്ടിക്കുകയും തെറ്റായ വിവരങ്ങൾ ലഭിച്ച രാഷ്ട്രീയ പിന്തുണക്കാരെ ഊർജ്ജസ്വലരാക്കുകയും ചെയ്തേക്കാം, പക്ഷേ അവ  വോട്ടർമാരെ അകറ്റുകയും നിയമാനുസൃത വിമർശനത്തിന്റെ സത്തയെ ഇല്ലാതാക്കുകയും ചെയ്യും. രാഹുൽ ഗാന്ധി വിശ്വസനീയനായ ഒരു ദേശീയ നേതാവായി സ്വയം സ്ഥാപിക്കാൻ ആഗ്രഹിക്കുന്നുവെങ്കിൽ, സംയമനം, വാദത്തിലെ വ്യക്തത, ഭരണഘടനാ സ്ഥാപനങ്ങളോടുള്ള ബഹുമാനം എന്നീ കാര്യങ്ങളിൽ ശ്രദ്ധിക്കണം. പ്രകോപനപരമായ അധിക്ഷേപങ്ങൾ അദ്ദേഹം ഉപേക്ഷിക്കുകയും വേണം.. 

 ഒരു നേതാവിന്റെ ശക്തി അയാളുടെ അധിക്ഷേപങ്ങളുടെ കാഠിന്യത്തിലല്ല, മറിച്ച്  വാദങ്ങളുടെ ഗുണനിലവാരത്തിലും, പെരുമാറ്റത്തിന്റെ അന്തസ്സിലും, ബദൽ കാഴ്ചപ്പാടിന്റെ വിശ്വാസ്യതയിലുമാണ്.

കെ എ സോളമൻ

രാഷ്ട്രീയ പ്രതിസന്ധി

രാഷ്ട്രീയ പ്രതിസന്ധിയും പാറ്റാ പ്രഹസനവും
​സ്വന്തം നിലനിൽപ്പ് അപകടത്തിലാകുമ്പോൾ ജനശ്രദ്ധ തിരിച്ചുവിടാൻ സി.പി.എം നടത്തുന്ന വിലകുറഞ്ഞ രാഷ്ട്രീയ തന്ത്രങ്ങളുടെ ഏറ്റവും ഒടുവിലത്തെ ഉദാഹരണമാണ് ഡൽഹിയിൽ കണ്ടത്. രോഗാതുരനും വയോധികനുമായ മുൻമുഖ്യമന്ത്രി പിണറായി വിജയനെ മുന്നിൽ നിർത്തി ജോൺ ബ്രിട്ടാസും കെ.എൻ. ബാലഗോപാലും ചേർന്ന് ഒരുക്കിയ കെണിയിലാണ് അദ്ദേഹം വീണത്. തനിക്കും മകൾക്കും മരുമകനുമെതിരെയുള്ള ഗുരുതരമായ കേസ് അന്വേഷണങ്ങളെയും അഴിമതി ആരോപണങ്ങളെയും രാഷ്ട്രീയമായി നേരിടാൻ അണികളെ നിരത്തേണ്ടത് അദ്ദേഹത്തിൻറെ ആവശ്യമാണ്.

145 കോടിയോളം ജനങ്ങളുള്ള ഇന്ത്യ മഹാരാജ്യത്ത് വിരലിലെണ്ണാവുന്ന ഏതാനും അണികളെ മാത്രം അണിനിരത്തി നടത്തിയ ഈ 'പാറ്റാ സമരം' തികച്ചും അവജ്ഞയോടെ മാത്രമേ കാണാനാകൂ. സ്വന്തം കുടുംബത്തിന്റെ സുരക്ഷിതത്വത്തിന് വേണ്ടി മാത്രമാണ് പ്രായത്തിന്റെ അസ്വസ്ഥതകൾ പോലും അവഗണിച്ച് പിണറായി ഇത്തരമൊരു സമരത്തിന് പാറ്റകൾക്ക് ഒപ്പം ചേർന്നത്.

​പാർട്ടിയുടെ കേന്ദ്ര നേതാക്കൾ കസ്റ്റഡിയിലായിട്ടും കേരളത്തിൽ അതിനെതിരെ കാര്യമായ ഒരു പ്രതിഷേധം പോലും ഉയർന്നുവന്നില്ലയെന്നത് അന്വേഷിക്കുന്നതും നല്ലതാണ്.

കേന്ദ്ര ഏജൻസികളുടെ അന്വേഷണത്തെ ഭയന്ന് നടത്തുന്ന ഇത്തരം നാടകങ്ങൾ കൊണ്ട് ക്രിമിനൽ-അഴിമതി കേസുകളിൽ നിന്ന് രക്ഷപ്പെടാമെന്നത് വ്യാമോഹം മാത്രം.
-കെ എ സോളമൻ

വിജിലൻസിന് പൂട്ടിടുമോ ?

#വിജിലൻസിന് പൂട്ടിടുമോ, അതോ ഹൈക്കോടതിക്കെതിരെയും അന്വേഷിക്കുമോ!

ഒരു കേസിൽ എഫ്.ഐ.ആർ. രജിസ്റ്റർ ചെയ്യേണ്ടതുണ്ടോ എന്നത് രാഷ്ട്രീയ സൗകര്യത്തിനനുസരിച്ച് തീരുമാനിക്കേണ്ട കാര്യമല്ല; അത് നിയമപരമായ മാനദണ്ഡങ്ങൾക്കനുസരിച്ച് പരിശോധിക്കേണ്ട വിഷയമാണ്. പിണറായി വിജയനും മരുമകൻ മുഹമ്മദ് റിയാസിനുമെതിരായ ആരോപണങ്ങളിൽ ഇ.ഡി.യുടെ കണ്ടെത്തലുകളും തുടർനടപടികൾ സംബന്ധിച്ച ആവശ്യങ്ങളും ഉയർന്നിട്ടും എഫ് ഐ ആർ രജിസ്റ്റർ ചെയ്യാതെ സംസ്ഥാന സർക്കാർ സ്വന്തം വിജിലൻസ് അന്വേഷണവുമായി മുന്നോട്ടു പോയതിനെതിരെ ശക്തമായ വിമർശനമുണ്ട് 

ഇപ്പോൾ ഹൈക്കോടതിയുടെ ഇടപെടൽ ഉണ്ടായ സാഹചര്യത്തിൽ, സർക്കാർ പ്രഖ്യാപിച്ച വിജിലൻസ് അന്വേഷണം പൂട്ടിക്കെട്ടാതെ നിർവാഹമില്ല  ഇ  ഡി ആവശ്യപ്പെട്ടിട്ടും എഫ് ഐ ആർ ഇടാതിരുന്നത് ഏതു നിയമത്തിന്റെ അടിസ്ഥാനത്തിലായിരുന്നു എന്നത് സർക്കാർ വ്യക്തമാക്കണം. ഹൈക്കോടതിയുടെ പുതിയ നിർദ്ദേശം സർക്കാരിന്റെ രാഷ്ട്രീയ കണക്കുകൂട്ടലുകൾക്ക് എതിരായ  സാഹചര്യത്തിൽ, ഇനി കോടതിക്കെതിരെയും വിജിലൻസ് അന്വേഷണം പ്രഖ്യാപിക്കുമോ ? 

നിയമവാഴ്ചയെന്നത് സർക്കാരിന് സൗകര്യമുള്ളപ്പോൾ മാത്രം ഓർക്കേണ്ട കാര്യമല്ല.  കോടതി നിർദേശങ്ങൾ പാലിക്കേണ്ടത് സർക്കാരിൻറെ ഭരണഘടനാപരമായ ഉത്തരവാദിത്വമാണ്; അവയ്ക്കെതിരെ രാഷ്ട്രീയ ചങ്ങാത്തത്തിന്റെ പേരിൽ പുറംതിരിഞ്ഞു നിൽക്കാൻ കഴിയില്ല. ആരോപണങ്ങൾ തെളിയിക്കപ്പെടുന്നതിന് മുമ്പ് ആരെയും കുറ്റക്കാരനായി പ്രഖ്യാപിക്കാനാവില്ലെന്നതുപോലെ, അന്വേഷണത്തിന്റെ പേരിൽ ആരെയും അനിശ്ചിതകാലം സംശയത്തിന്റെ നിഴലിൽ നിർത്താനും പാടില്ല.

ജനാധിപത്യത്തിൽ സർക്കാരിന് കോടതിയോട് വിയോജിക്കാം; പക്ഷേ നിയമത്തിന്റെ നടപടിക്രമങ്ങളെ  രാഷ്ട്രീയ ചങ്ങാത്തത്തിന്റെ പേരിൽ അവഗണിക്കാതിരിക്കുക. തന്നെ വേണം.

- കെ എ സോളമൻ

സ്വർണ്ണം വിൽക്കരുത്

#സ്വർണംവിൽക്കൂ" എന്ന പരസ്യം: ജനങ്ങളുടെ സമ്പാദ്യത്തിനെതിരായ കച്ചവടക്കണ്ണ്

അത്യാവശ്യ ഘട്ടങ്ങളിൽ ഒരു കുടുംബത്തിന് താങ്ങാകുന്ന സമ്പാദ്യമാണ് സ്വർണം. എന്നാൽ, “സ്വർണം പണയം വയ്ക്കരുത്, വിറ്റ് പണമാക്കണം” എന്ന തരത്തിലുള്ള നിരന്തര പരസ്യങ്ങളിലൂടെ ജനങ്ങളുടെ കൈവശമുള്ള സമ്പാദ്യം എങ്ങനെയും വിപണിയിലെത്തിക്കാനുള്ള ശ്രമം അത്യന്തം ജനവിരുദ്ധമാണ്. 

പണയം വയ്ക്കുകയോ ആവശ്യത്തിനനുസരിച്ച് സൂക്ഷിക്കുകയോ ചെയ്യുന്നതിനുപകരം സ്വർണം വിറ്റുതുലയ്ക്കാൻ ജനങ്ങളെ പ്രേരിപ്പിക്കുന്നത് സമ്പാദ്യശീലത്തെ തന്നെ തകർക്കുന്ന സമീപനമാണ്. ഉപഭോക്താവിന്റെ സാമ്പത്തിക സുരക്ഷയേക്കാൾ വ്യാപാരിയുടെ വിറ്റുവരവിന് പ്രാധാന്യം നൽകുന്ന ഇത്തരം പരസ്യങ്ങൾ സമൂഹത്തിൽ ശക്തമായ വിമർശനത്തിന് വിധേയമാകേണ്ടതാണ്.

സ്വർണം വാങ്ങുകയും ആഭരണങ്ങൾ നിർമ്മിക്കുകയും ചെയ്ത് ഉപജീവനം നടത്തുന്ന ആയിരക്കണക്കിന് ചെറുകിട സ്വർണപ്പണിക്കാരും കരകൗശല തൊഴിലാളികളും ഈ വിപണിയുടെ ഭാഗമാണ്. എന്നാൽ, സ്വർണം വിറ്റഴിക്കാനുള്ള അമിതമായ പ്രചാരണം ആഭരണനിർമാണ മേഖലയെയും പരോക്ഷമായി ബാധിക്കും. 

ജനങ്ങളുടെ സമ്പാദ്യം ചോർത്തിയെടുക്കുന്ന തരത്തിലുള്ള ഉപഭോക്തൃപ്രേരണകൾക്ക് നിയന്ത്രണമേർപ്പെടുത്തേണ്ടത് സർക്കാരിന്റെയും ബന്ധപ്പെട്ട നിയന്ത്രണ സംവിധാനങ്ങളുടെയും ഉത്തരവാദിത്വമാണ്. ജനങ്ങളുടെ സാമ്പത്തിക സുരക്ഷയെക്കാൾ ലാഭതാൽപര്യത്തിന് മുൻതൂക്കം നൽകുന്ന ഇത്തരം പരസ്യങ്ങളെ ശക്തമായി അപലപിക്കുകയും, അവയ്ക്കെതിരെ ആവശ്യമായ നിയന്ത്രണനടപടികൾ സ്വീകരിക്കുകയും വേണം. 

ജനങ്ങളുടെ സമ്പാദ്യം വിപണിയുടെ ഇരയാക്കരുത്; സ്വർണം വിൽക്കാൻ നിർബന്ധിക്കുന്ന പരസ്യങ്ങൾക്കുപകരം സമ്പാദ്യത്തെ സംരക്ഷിക്കാൻ പ്രേരിപ്പിക്കുന്ന സന്ദേശങ്ങളാണ് സമൂഹത്തിന് ആവശ്യം.

_ കെ എ സോളമൻ

രാഷ്ട്രീയ നാടകങ്ങൾ

#ഡൽഹിയിലെ #രാഷ്ട്രീയനാടകങ്ങൾ

ഡൽഹിയിൽ രാഹുൽ ഗാന്ധിയുടെ നേതൃത്വത്തിലുള്ള കോൺഗ്രസ് സമരങ്ങൾ രാഷ്ട്രീയ നാടകങ്ങൾ മാത്രമായി ചുരുങ്ങുന്നുവെന്ന രൂക്ഷമായ വിമർശനമാണ് പല കേന്ദ്രങ്ങളിൽ നിന്നും ഉയരുന്നത്. കേരളത്തിലെ ചാനലുകൾ കൊട്ടിഘോഷിക്കുന്ന രാഹുൽ- പ്രിയങ്ക സമരം മറ്റു സ്റ്റേറ്റുകളിലെ ചാനലുകൾ ശ്രദ്ധിക്കുന്നതുപോലുമില്ല

ജനകീയ പ്രശ്നങ്ങൾക്ക് ശാശ്വത പരിഹാരം കാണുന്നതിന് പകരം, മാധ്യമ ശ്രദ്ധ ആകർഷിക്കാൻ തിരഞ്ഞെടുപ്പ് ലക്ഷ്യം വെച്ചുള്ള വെറും പ്രഹസനങ്ങളായാണ് ഇത്തരം പ്രക്ഷോഭങ്ങളെ രാഷ്ട്രീയ നിരീക്ഷകർ വിലയിരുത്തുന്നത്. ഭരണഘടന സംരക്ഷിക്കുന്നുവെന്ന് അവകാശപ്പെട്ട് തടിയിൽ തീർത്ത്, ചുവപ്പു പെയിൻ്റടിച്ച ഭരണഘടന ഫലകവുമായി നടക്കുന്നവർക്ക് സ്വന്തം പാർട്ടിയിലെ പ്രശ്നങ്ങൾ പരിഹരിക്കാൻ കഴിയുന്നില്ല.   പാർട്ടിയിലെ ആഭ്യന്തര പ്രശ്നങ്ങളും  ആശയവിനിമയത്തിലെ പോരായ്മകളും  സൂചിപ്പിക്കുന്നത് കോൺഗ്രസ് നേതൃത്വം വൻപരാജയമാണെന്ന യാഥാർത്ഥ്യമാണ്.

 ജനക്ഷേമകരമായ നയങ്ങളെ രചനാത്മകമായി എതിർക്കുന്നതിനേക്കാൾ ഉപരി, നിരന്തരമായ സമരങ്ങളിലൂടെ രാജ്യത്ത് അസ്ഥിരത സൃഷ്ടിക്കാനാണ്  ഇണ്ടീ മുന്നണി ശ്രമിക്കുന്നത് എന്ന ആക്ഷേപവും ശക്തമാണ്. യാതൊരു വ്യക്തമായ അജണ്ടയുമില്ലാതെ സർക്കാരിനെതിരെ അകാരണമായി പ്രതിഷേധങ്ങൾ സംഘടിപ്പിക്കുന്നത് പൊതുജനങ്ങൾക്ക് അസൗകര്യങ്ങൾ സൃഷ്ടിക്കുകയല്ലാതെ മറ്റൊരു മാറ്റവും ഉണ്ടാക്കുന്നില്ല.

 ഉത്തരവാദിത്തമുള്ള ഒരു പ്രതിപക്ഷത്തിന്റെ റോൾ നിർവഹിക്കുന്നതിൽ പരാജയപ്പെടുന്ന കോൺഗ്രസ് നേതൃത്വത്തിന്റെ ഈ സമരരീതികൾ ജനങ്ങളിൽ നിന്ന് കൂടുതൽ അകലാൻ മാത്രമേ ഇടയാക്കൂ. 

പ്രധാനമന്ത്രിയാകാൻ അടുത്ത തിരഞ്ഞെടുപ്പ് നടക്കേണ്ട 2029 വരെ കാത്തിരിക്കാൻ വയ്യാത്ത രീതിയിലാണ് ഇസഡ് കാറ്റഗറി സംരക്ഷണത്തിൽ രാഹുൽഗാന്ധിയുടെ കോമിക് പ്രകടനങ്ങൾ. രസകരമായിട്ടുള്ളത് ഇവിടെ കേരളത്തിൽ തമ്മിലടിക്കുന്ന കമ്മി- കൊങ്ങി നേതാക്കൾ ഡൽഹിയിലെത്തി പരസ്പരം ഷാൾ അണിയിക്കുന്നതും  കെട്ടിപ്പിടിക്കുന്നതുമാണ്.

-കെ എ സോളമൻ

മാരാരിക്കുളം ജംഗ്ഷൻ

#മാരാരിക്കുളം_ജംഗ്ഷനിൽ_അടിപ്പാത_നിർമ്മിക്കണം

​ദേശീയപാത ആറുവരി നിർമാണത്തിന്റെ ഭാഗമായി മാരാരിക്കുളം റോഡ് അടച്ചുകെട്ടിയത് റെയിൽവേ സ്റ്റേഷൻ, വിനോദസഞ്ചാര കേന്ദ്രങ്ങൾ, ആരാധനാലയങ്ങൾ എന്നിവയിലേക്കുള്ള യാത്രാസൗകര്യങ്ങൾ പൂർണ്ണമായി തടസ്സപ്പെടുത്തിയിരിക്കുകയാണ്. സഞ്ചാരസ്വാതന്ത്ര്യമെന്ന മൗലികാവകാശത്തെ ഹനിക്കുന്ന ഈ അശാസ്ത്രീയ നിർമാണം മത്സ്യത്തൊഴിലാളികൾ, വിദ്യാർത്ഥികൾ, രോഗികൾ, വ്യാപാരികൾ തുടങ്ങി പ്രദേശത്തെയും അയൽപക്ക ഗ്രാമങ്ങളിലെയും ജനങ്ങളുടെ ജീവിതവും ഉപജീവന മാർഗ്ഗങ്ങളും കടുത്ത ദുരിതത്തിലാഴ്ത്തിയിട്ടുണ്ട്.

​വികസനം ജനങ്ങളുടെ സഞ്ചാരസ്വാതന്ത്ര്യത്തെയും മാന്യമായ ജീവിതത്തെയും നിഷേധിച്ചുകൊണ്ടാകരുത്. ഈ ഗുരുതരമായ പ്രശ്നത്തിന് പരിഹാരമായി മാരാരിക്കുളത്ത് അടിയന്തരമായി അടിപ്പാതയോ മേൽപ്പാതയോ നിർമ്മിക്കണമെന്ന് നാട്ടുകാരുടെ പ്രതിരോധ ധർണയും വിവിധ നിവേദനങ്ങളും ആവശ്യപ്പെടുന്നു. ജനങ്ങളെ സമരത്തിലേക്ക് തള്ളിവിടാതെ, അധികാരികൾ അടിയന്തരമായി ഇടപെട്ട് പ്രദേശവാസികളുടെ യാത്രാദുരിതം പരിഹരിക്കാൻ തയ്യാറാകണം.

-കെ എ സോളമൻ

സെക്രട്ടറിയെ മാത്രം ?

#ഇരുപത് വർഷത്തിനുശേഷം സെക്രട്ടറിയെ മാത്രം പ്രതിക്കൂട്ടിലാക്കുന്നതെന്തിന്?

സർക്കാർ വകുപ്പുകളിൽ ഒരു സെക്രട്ടറിക്ക് സ്വന്തം നിലയിൽ ഒരു കരാറുകാരന് പണം അനുവദിക്കാനോ തടഞ്ഞുവയ്ക്കാനോ കഴിയുമോ എന്നതാണ് ഈ വിഷയത്തിൽ ആദ്യം പരിശോധിക്കേണ്ട ഭരണപരമായ ചോദ്യം. സെക്രട്ടേറിയറ്റ് സംവിധാനത്തിൽ മന്ത്രി വകുപ്പിന്റെ രാഷ്ട്രീയ തലവനും സെക്രട്ടറി ഉദ്യോഗസ്ഥതല മേധാവിയുമാണ്. എന്നാൽ സാമ്പത്തികവും നയപരവുമായ തീരുമാനങ്ങൾ നിശ്ചിത ഫയൽ നടപടിക്രമങ്ങളിലൂടെയാണ് കൈക്കൊള്ളുന്നത്.

സെക്ഷൻ ഓഫീസർ, അണ്ടർ സെക്രട്ടറി, ജോയിന്റ് സെക്രട്ടറി തുടങ്ങിയ ഉദ്യോഗസ്ഥ തലങ്ങളിലൂടെ ഫയൽ നീങ്ങുകയും, അധികാരപരിധിക്കനുസരിച്ച് മന്ത്രിയുടെയോ അധികാരപ്പെടുത്തിയ ഉദ്യോഗസ്ഥന്റെയോ അനുമതി ലഭിക്കുകയും ചെയ്ത ശേഷമാണ് പ്രധാന സാമ്പത്തിക തീരുമാനങ്ങൾ നടപ്പാക്കുന്നത്.

 ഭരണാനുമതിയും സാമ്പത്തിക അനുമതിയും ലഭിച്ച പദ്ധതികളിലെ കരാറുകാരുടെ ബില്ലുകൾ ട്രഷറി വഴി മാറുന്നതിനുള്ള സാങ്കേതിക നടപടികളും ബന്ധപ്പെട്ട വകുപ്പ് ഓഫീസുകളിലെ എക്സിക്യൂട്ടീവ് എൻജിനീയർ, ചീഫ് എൻജിനീയർ തുടങ്ങിയവരുടെ നേതൃത്വത്തിലാണ് നടക്കുന്നത്. 

സെക്രട്ടറി നേരിട്ട് കരാറുകാരന് ചെക്കോ പണമോ നൽകുന്ന സംവിധാനമല്ല നിലവിലുള്ളത്.

അതിനാൽ, ഇരുപത് വർഷം മുമ്പ് ഒരു കരാറുകാരന് പണം ലഭിക്കാതിരുന്നതിനെ അന്നത്തെ സെക്രട്ടറിയുടെ വ്യക്തിപരമായ തീരുമാനമായി മാത്രം ചിത്രീകരിക്കുന്നത് ഭരണനടപടിക്രമങ്ങളുടെ യാഥാർഥ്യവുമായി എത്രത്തോളം പൊരുത്തപ്പെടുന്നു എന്നത് ഗൗരവമായി പരിശോധിക്കേണ്ടതാണ്. സാമ്പത്തിക അധികാരച്ചട്ടങ്ങളും ഫയൽ നടപടിക്രമങ്ങളും മറികടന്ന് ഒരു സെക്രട്ടറി സ്വന്തം നിലയിൽ ഇത്തരം തീരുമാനം എടുത്തുവെന്ന് ആരോപിക്കുന്നുവെങ്കിൽ, അതിന് വ്യക്തമായ രേഖകളും ഉത്തരവാദിത്തം നിർണയിക്കുന്ന ഔദ്യോഗിക തെളിവുകളും പുറത്തുവരേണ്ടതുണ്ട്.

ഇരുപത് വർഷം പിന്നിട്ടശേഷം അന്നത്തെ പൊതുമരാമത്ത് സെക്രട്ടറി ഗ്യാനേഷ് കുമാറിനെ മാത്രം പ്രതിക്കൂട്ടിൽ നിർത്തുകയും, അതേ കാലഘട്ടത്തിലെ രാഷ്ട്രീയ നേതൃത്വത്തിന്റെയും മറ്റ് ബന്ധപ്പെട്ട ഉദ്യോഗസ്ഥരുടെയും ഉത്തരവാദിത്തം പരിശോധിക്കാതിരിക്കുകയും ചെയ്യുന്നത് സ്വാഭാവികമായും ചോദ്യങ്ങൾ ഉയർത്തും. പ്രത്യേകിച്ച്, അന്ന് വകുപ്പിന്റെ രാഷ്ട്രീയ ചുമതല വഹിച്ചിരുന്ന മന്ത്രി എം. കെ മുനീറിന്റെ പങ്കും ബന്ധപ്പെട്ട ഫയൽ നടപടികളും പരിശോധിക്കാതെ സെക്രട്ടറിയെ മാത്രം ലക്ഷ്യമിടുന്നത് ഭരണപരമായ നീതിയുടെ മാനദണ്ഡങ്ങളിൽ സംശയം ജനിപ്പിക്കുന്നതാണ്.

ഇത് വ്യക്തിപരമായ കുറ്റാരോപണത്തിന്റെ വിഷയമല്ല; ഉത്തരവാദിത്തം നിർണയിക്കുന്നതിലെ ഭരണപരമായ മാനദണ്ഡങ്ങളുടെ വിഷയമാണ്. തീരുമാനം ഒരു വ്യക്തിയുടെതായിരുന്നോ, അതോ നിശ്ചിത ഫയൽ നടപടിക്രമങ്ങളിലൂടെ കൂട്ടായ ഭരണതീരുമാനമായിരുന്നോ എന്നതാണ് ആദ്യം വ്യക്തമാക്കേണ്ടത്.

അതിനാൽ, ഇരുപത് വർഷത്തിനുശേഷം ഗ്യാനേഷ് കുമാറിനെ മാത്രം പ്രതിക്കൂട്ടിൽ നിർത്തുന്നത് എന്തിന്റെ അടിസ്ഥാനത്തിലാണെന്ന് ബന്ധപ്പെട്ടവർ വ്യക്തമാക്കണം. 

ലഭ്യമായ രേഖകളും അന്നത്തെ ഫയൽ നടപടികളും പുറത്തുവന്ന് സുതാര്യമായ അന്വേഷണം നടക്കാതെ ഒരാളെ മാത്രം കുറ്റക്കാരനാക്കുന്നത് ദുരുദ്ദേശപരവും രാഷ്ട്രീയ പ്രേരിതവുമായ നടപടിയാണെന്ന സംശയം സ്വാഭാവികമായും ഉയർത്തുന്നു.

- കെ എ സോളമൻ

രാഷ്ട്രീയ- നിയമോപദേശ പ്രഹസനങ്ങൾ

#രാഷ്ട്രീയ_നിയമോപദേശ #പ്രഹസനങ്ങൾ

കേരള രാഷ്ട്രീയത്തിൽ ഇപ്പോൾ അരങ്ങേറിക്കൊണ്ടിരിക്കുന്ന സംഭവവികാസങ്ങൾ കേവലം രാഷ്ട്രീയ പ്രഹസനങ്ങൾക്കുമപ്പുറം ഭരണവർഗ്ഗത്തിന്റെ ഇരട്ടത്താപ്പുകളെയാണ് തുറന്നുകാട്ടുന്നത്. എല്ലാ നദികളും കടലിലേക്ക് ഒഴുകുന്നതുപോലെ, സംസ്ഥാനത്തെ സകല പ്രതിസന്ധികളും വിവാദങ്ങളും ഒടുവിൽ ഒരു വ്യക്തിയുടെ പുറത്തേക്കുമാത്രം കെട്ടിവെക്കുന്ന വിചിത്രമായ രീതിയാണ് ഇവിടെ കാണാൻ കഴിയുന്നത്. 

പാറ്റകളും ഇണ്ടികളും ഒക്കെ ചേർന്ന് മോദിയെ പുറത്താക്കാൻ എന്ന മട്ടിൽ ഡൽഹിയിൽ ഗ്യാനേഷ് കുമാറിനെതിരെ സമരം പ്രഖ്യാപിക്കുമ്പോൾ, കേരളത്തിൽ  ഭരണകക്ഷി വാളോങ്ങുന്നതും അദ്ദേഹത്തിന് എതിരെ തന്നെയാണ്   ഡൽഹിയിൽ പോയി പോലീസുമായി ലുട്ടാപ്പി മോഡൽ ഉരുട്ടിപ്പിടുത്തത്തിന്  മടിയുള്ളതുകൊണാണ്   കേരളത്തിലെ രാഷ്ട്രീയ മൈതാനത്ത് കൃത്രിമ സമരാന്തരീക്ഷം സൃഷ്ടിക്കുന്നത് 

​ഇരുപത് വർഷം മുമ്പ് നടന്ന ഒരു ആത്മഹത്യ സംഭവത്തിൽ അന്നത്തെ പൊതുമരാമത്ത് സെക്രട്ടറിയായ ഗ്യാനേഷ് കുമാറിനെ പ്രതിക്കൂട്ടിലാക്കാൻ ഭരണകക്ഷി  നടത്തുന്ന നീക്കങ്ങൾക്ക് പിന്നിൽ വ്യക്തമായ രാഷ്ട്രീയ ലക്ഷ്യങ്ങളുണ്ട്. 'മോദി അനുഭാവിയാണ് സതീശൻ' എന്ന തരത്തിൽ മാർക്സിസ്റ്റ് പാർട്ടി ഉയർത്തുന്ന ആരോപണങ്ങളെ പ്രതിരോധിക്കാൻ ഇത്തരം തന്ത്രങ്ങൾ പയറ്റുന്നത് യു.ഡി.എഫിന് രാഷ്ട്രീയമായ ആവശ്യമായി തോന്നിയിട്ടുണ്ടാകാം. അതിന്റെ ഭാഗമായി ലഭിച്ച 'നിയമോപദേശത്തിന്റെ' പുറത്താണ് ഇപ്പോൾ ഈ രംഗപ്രവേശം എന്നതും വ്യക്തമാണ്. 

എന്നാൽ ഇത്തരം നിയമോപദേശം നൽകുന്ന ഉപദേഷ്ടാക്കളുടെ കാര്യമാണ് കഷ്ടം.  ​കഴിഞ്ഞ എൽ.ഡി.എഫ് ഭരണകാലത്തും സമാനമായ ദൃശ്യങ്ങളാണ് കേരളം കണ്ടത്. സർക്കാരിന്റെ ഭാഗത്തുനിന്നുമുണ്ടാകുന്ന സകല കൊള്ളരുതായ്മകളും  കോടതികളിൽ തോറ്റുതുന്നം പാടിയ കേസുകളും അവസാനം നിയമോപദേഷ്ടാക്കളുടെ തലയിൽ കെട്ടിവെച്ച് തടിയൂരുന്നതായിരുന്നു പിണറായിയുടെയും കൂട്ടരുടെയും രീതി.

​സ്വർണ്ണക്കടത്ത്,  സ്‌പ്രിംഗ്ളർ,  കരിമണൽ മാസപ്പടി, പി പി ഇ കിറ്റ്,  ഉൾപ്പെടെ കഴിഞ്ഞ രണ്ട് ദശവർഷത്തിനിടയിൽ കേരളത്തിൽ ഉയർന്നുവന്ന എത്രയോ ഗൗരവമേറിയ അഴിമതി കേസുകൾ ഇന്നും അന്വേഷണത്തിന്റെ വെളിച്ചം കാണാതെ കിടപ്പുണ്ട്. സാധാരണക്കാരുടെ നികുതിപ്പണം കൊണ്ട് പ്രവർത്തിക്കുന്ന അന്വേഷണ ഏജൻസികൾക്ക് മുന്നിൽ ഇത്രയധികം യഥാർത്ഥ തെളിവുകളുള്ള കേസുകൾ തരിപ്പണമായി കിടക്കുമ്പോൾ, അതെല്ലാം വിസ്മരിച്ചുകൊണ്ട് ഇത്തരത്തിലുള്ള അനാവശ്യ വിവാദങ്ങളിലേക്ക് വിജിലൻസ് അന്വേഷണം വഴിതിരിച്ചുവിടുന്നത് ഇപ്പോഴത്തെ സർക്കാരിന്റെ അല്പത്തരമല്ലാതെ മറ്റെന്താണ്?

​ജനങ്ങളുടെ യഥാർത്ഥ പ്രശ്നങ്ങളിൽ നിന്ന് ശ്രദ്ധ തിരിക്കാനും പരസ്പരമുള്ള രാഷ്ട്രീയ ഒത്തുകളികൾ മറച്ചുപിടിക്കാനും നിയമോപദേശങ്ങളുടെ ആനുകൂല്യത്തിൽ നടത്തുന്ന ഇത്തരം നാടകങ്ങൾ കേരളീയ സമൂഹം തിരിച്ചറിയേണ്ടതുണ്ട്. ഭരണപക്ഷവും പ്രതിപക്ഷവും ഒരേ തൂവൽ പക്ഷികളായി മാറി ജനങ്ങളെ കബളിപ്പിക്കുന്ന ഈ രാഷ്ട്രീയ വഞ്ചന കേരളത്തിന്റെ ജനാധിപത്യ സംവിധാനത്തിന് ഏൽപ്പിക്കുന്ന പരുക്ക് നിസ്സാരമല്ല..

-കെ എ സോളമൻ

നശീകരണവും കോടതി ഉത്തരവുകളും

#നശീകരണവും #കോടതി_ഉത്തരവുകളും

രാഷ്ട്രീയ യുവജന സംഘടനകൾ അടുത്തിടെ നടത്തിയ പ്രതിഷേധങ്ങb ജുഡീഷ്യൽ ഉത്തരവുകളോടുള്ള നഗ്നമായ അവഗണനയും നിയമവാഴ്ചയോടുള്ള വെല്ലുവിളിയാണ്. 

പൊതു റോഡുകളിലും സർക്കാർ ഭൂമിയിലും അനധികൃത ഹോർഡിംഗുകൾ മൂലമുണ്ടാകുന്ന  കുഴപ്പങ്ങൾ, പരിസ്ഥിതി അപകടങ്ങൾ, പൊതുജന ശല്യം എന്നിവ ഇല്ലാതാക്കുന്നതിന് കേരള ഹൈക്കോടതിയുടെ കർശനമായ ഉത്തരവുകൾ ഉണ്ട്. രാഷ്ട്രീയ പാർട്ടികളും  എതിർ ഗ്രൂപ്പുകളും നിയമവിരുദ്ധപ്രകടനങ്ങളിലൂടെ തെരുവുകളിൽ നടത്തുന്നത് ജുഡീഷ്യൽ അധികാരത്തോടും പൊതു ക്രമസമാധാനത്തോടുമുള്ള അവഹേളനമാണ്.

ഈ ലജ്ജാകരമായ ലംഘനത്തിന്റെ ഉത്തരവാദിത്തം ഒന്നിലധികം ചുമലുകളിലാണ്,  കോടതി ഉത്തരവുകളെ മനഃപൂർവ്വം ലംഘിക്കുന്ന രാഷ്ട്രീയ സംഘടനകളും പ്രവർത്തകരും മുതൽ

തദ്ദേശ സ്വയംഭരണ സ്ഥാപനങ്ങളുടെ  സെക്രട്ടറിമാരും മുനിസിപ്പൽ അധികാരികളും വരെ.  അനധികൃത ഫ്ലക്സ് ബോർഡുകളും ബാനറുകളും  തടയുന്നതിന് പഞ്ചായത്ത്- മുൻസിപ്പൽ- കോർപ്പറേഷൻ അധികാരികൾ പൂർണമായും പരാജയപ്പെട്ടു എന്നതിന് തെളിവാണ് കഴിഞ്ഞ ദിവസങ്ങളിൽ ലഹളക്കാർ വ്യാപകമായി നശിപ്പിച്ച എതിർ ചേരികളുടെ പരസ്യബോർഡുകളും ബാനറുകളും.   

ഈ സാഹചര്യത്തിൽ പൊതുജനവിശ്വാസം പുനഃസ്ഥാപിക്കുന്നതിനും ജുഡീഷ്യറിയുടെ സത്യസന്ധത ഉയർത്തിപ്പിടിക്കുന്നതിനും,  ഭരണാധികാരികൾക്ക് ഉത്തരവാദിത്തമുണ്ട്.  കോടതി ഉത്തരവ് നടപ്പിലാക്കാതിരുന്ന തദ്ദേശസ്വയംഭരണ സ്ഥാപനങ്ങൾക്ക്  കനത്ത സാമ്പത്തിക പിഴ ചുമത്തുകയും, അശ്രദ്ധരായ ഉദ്യോഗസ്ഥരിൽ നിന്ന് ചെലവ് ഈടാക്കുകയും വേണം .

രാഷ്ട്രീയ ഏറ്റുമുട്ടലിനുള്ള  മേഖലകളായി പൊതു ഇടങ്ങളെ കാണുന്നവർക്കെതിരെ കർശനമായ നിയമനടപടി സ്വീകരിക്കണം 

കെ എ സോളമൻ

രാഷ്ട്രീയ സംസ്കാരത്തിന് അപമാനം

#രാഷ്ട്രീയ സംസ്കാരത്തിന് അപമാനം

കേന്ദ്ര ആഭ്യന്തരമന്ത്രി അമിത് ഷായ്‌ക്കെതിരെ കരിങ്കൊടി കാണിച്ച സംഭവവും, അതൊരു സംഘടനാപരമായ തീരുമാനമാണെന്ന് മന്ത്രി ഒ.ജെ. ജനീഷ് പരസ്യമായി ന്യായീകരിച്ചതും അങ്ങേയറ്റം അപലപനീയവും രാഷ്ട്രീയ മര്യാദകളുടെ ലംഘനവുമാണ്. 

ഭരണഘടനാനുസൃതമായി സത്യപ്രതിജ്ഞ ചെയ്ത് സംസ്ഥാന മന്ത്രിസഭയിൽ സേവനമനുഷ്ഠിക്കുന്ന ഒരു വ്യക്തി, കേന്ദ്രമന്ത്രിക്കെതിരെ പ്രതിഷേധിക്കാൻ ഔദ്യോഗിക പദവിയുടെ സംരക്ഷണത്തിലിരുന്ന് ആളുകളെ നിയോഗിച്ചത് തികച്ചും ജനാധിപത്യവിരുദ്ധവും കേട്ടുകേൾവിയില്ലാത്തതുമായ പ്രവൃത്തിയാണ്. ഭരണഘടനാപരമായ പദവികളും രാഷ്ട്രീയ താൽപ്പര്യങ്ങളും തമ്മിലുള്ള അതിരുകൾ ഇല്ലാതാക്കുന്ന ഇത്തരം പ്രവണതകൾ രാജ്യത്തിന്റെ ഫെഡറൽ സംവിധാനത്തിനും ഭരണഘടനാ മര്യാദകൾക്കും വലിയ ഭീഷണിയാണ് ഉയർത്തുന്നത്.

 ഉത്തരവാദപ്പെട്ട സ്ഥാനത്തിരിക്കുന്നവർ തന്നെ അക്രമ രാഷ്ട്രീയത്തിനും പ്രതിഷേധ സമരങ്ങൾക്കും ഔദ്യോഗിക  പിന്തുണ നൽകുന്നത് സംസ്ഥാനത്ത് ക്രമസമാധാന തകർച്ചയ്ക്കും രാഷ്ട്രീയ സംഘർഷങ്ങൾക്കും മാത്രമേ വഴിവെക്കൂ. ജനാധിപത്യപരമായ സംവാദങ്ങൾക്കും നയപരമായ ചർച്ചകൾക്കും പകരം കരിങ്കൊടിയും പ്രതിഷേധങ്ങളും ഭരണാധികാരികളുടെ തന്നെ ഒത്താശയോടെ സംഘടിപ്പിക്കപ്പെടുന്നത് കേരളത്തിന്റെ പൊതുരാഷ്ട്രീയ സംസ്കാരത്തിന് അപമാനകരമാണ്.

- കെ എ സോളമൻ

ശൈലജടീച്ചറുടെ ഉപദേശം

#ശൈലജടീച്ചറുടെ #സംശയം

​റോഡും പാലവും പണിതു എന്ന് പറഞ്ഞ് വോട്ടു ചോദിച്ചാൽ, അതിനു പിന്നിലെ കമ്മീഷൻ കണക്കുകൾ നാട്ടുകാർ കാണാതെ പോകുമെന്നാണ് കമ്മ്യൂണിസ്റ്റ് ലോജിക്! പാലം പണിത വകയിൽ കോടികൾ പോക്കറ്റിലാക്കിയതും, പകൽവെളിച്ചം പോലെ തെളിഞ്ഞ അഴിമതിക്കഥകളും ജനങ്ങൾ അറിഞ്ഞില്ലെന്ന മട്ടിലാണ് ഇപ്പോഴും നേതാക്കളുടെ നിഷ്കളങ്ക വ്യാഖ്യാനം. ലക്ഷങ്ങൾ മുടക്കി നടപ്പാക്കിയ വൻകിട പദ്ധതികളുടെയൊക്കെ പിന്നിൽ ആരൊക്കെയാണ് കീശ വീർപ്പിച്ചത് എന്ന് സാമാന്യ ബോധ്യമുള്ള ഏതൊരു സാധാരണക്കാരനും അറിയാം. ശബരിമല അയ്യപ്പൻ്റേതുൾപ്പെടെ വെട്ടിച്ച തുകയുടെ കണക്കെടുപ്പ് നാട്ടുകാർ നടത്തിക്കഴിഞ്ഞാൽ പിന്നെ എങ്ങനെയാണ് ടീച്ചറെ എൽഡിഎഫിനെ  ജനം പൂമാലയിട്ടു സ്വീകരിക്കുക?

​അതൊക്കെ അവിടെ നിൽക്കട്ടെ, നാടിന്റെ പുതുതലമുറയെ മൊത്തത്തിൽ ലഹരിയുടെ അടിമകളാക്കി മാറ്റിയ വിപ്ലവകരമായ നേട്ടത്തെക്കുറിച്ച് എപ്പോഴെങ്കിലും ചിന്തിച്ചിട്ടുണ്ടോ? സ്കൂൾ കുട്ടികൾ ഉൾപ്പെടെയുള്ള പിഞ്ചുകുട്ടികളുടെ കൈകളിൽ മയക്കുമരുന്ന് എത്തിച്ചുകൊടുത്ത് കേരളത്തെ ഒരു ആഗോള ഡ്രഗ്സ് ഹബ്ബാക്കി മാറ്റിയതു പോരെ  സർക്കാരിനെ ചവിട്ടി  പുറത്താക്കാൻ? റോഡിലൂടെ നടക്കുമ്പോൾ കുഴിയുണ്ടോ എന്ന് നോക്കുന്നതിനേക്കാൾ ഭയത്തോടെയാണ് ഇന്ന് മാതാപിതാക്കൾ തങ്ങളുടെ മക്കളെ സ്കൂളിലേക്ക് അയക്കുന്നത്.

 വികസനത്തിന്റെ തിളക്കമുള്ള ബോർഡുകൾ വെച്ച് ജനങ്ങളുടെ കണ്ണിൽ പൊടിയിടാൻ നോക്കി.  പക്ഷെ സ്വന്തം മക്കളുടെ ഭാവി കോഞ്ഞാട്ടയാകുന്നതുകണ്ട് ജനം പൊട്ടിത്തെറിച്ചു.  അങ്ങനെ ഉണ്ടായ  ജനരോഷത്തിലാണ് ആടിയുലയില്ല എന്നു പറഞ്ഞ കപ്പൽ അപ്പാടെ ഉലഞ്ഞ് കടലിൻ്റെ അഗാധതയിൽ പതിച്ചത്.

-കെ എ സോളമൻ

ബാനറിലെ ഭാഷാ ശാസ്ത്രം

#ബാനറിലെ #ഭാഷാശാസ്ത്രം

ചവറ ഗുഹാനന്ദപുരം സ്കൂളിലെ കുരുന്നുകൾ ഉയർത്തിയ ആ വിശേഷ പോസ്റ്ററിലെ ഭാഷാശാസ്ത്രം കണ്ട് ആംഗലേയ പ്രഫസർമാർ വരെ ഞെട്ടി.  ബാനറിൽ കണ്ട പൂക്കി എന്ന വാക്കിന് ക്യൂട്ട് എന്നല്ലേ അർത്ഥം എന്ന് ഷേക്സ്പിയറെയും വൈലോപ്പ(പ്പി)ള്ളിയെയും  ഒരുമിച്ച് ഞെട്ടിച്ച മാർക്സിസ്സ് സൈദ്ധാന്തിക കൊല്ലംകാരി ജറോമിയുടെ കണ്ടെത്തൽ അപാരം. ശുംഭൻ എന്നതിന് പ്രകാശം പരത്തുന്നവൻ എന്ന് അർത്ഥം പറഞ്ഞ മുളകുവെള്ളം (എം വി ) ജയരാജൻ്റെ പണ്ഡിതരെയും വെല്ലുന്ന പാണ്ഡിത്യം.

 " പോടാ പൂമോനെ" എന്ന് ബാനറിൽ എഴുതിയിരുന്നെങ്കിൽ അത് പ്രകൃതിസ്നേഹം കൊണ്ടാണെന്നും, "പൂ" എന്നാൽ ഇംഗ്ലീഷിൽ "ഫ്‌ളവർ" ആണെന്നും പറഞ്ഞ് ന്യായീകരിക്കാൻ തലയിൽ ഹൗസ് ചുമക്കുന്ന  മുൻ ഉന്നത വിദ്യാഭ്യാസ മന്ത്രിണി തന്നെ വരുമായിരുന്നു. അതെന്തായാലും  ഇംഗ്ലീഷ് സാഹിത്യത്തിൽ ഡോക്ടറേറ്റ് ഉള്ളവരുടെ ഭാഷാ വൈഭവം പ്രകടമായതോടെ സംഭവം അന്താരാഷ്ട്ര നിലവാരത്തിലേക്ക് ഉയർന്നു. വാക്കുകളുടെ വ്യാകരണവും അന്തർധാരയും കണ്ടുപിടിക്കാൻ പി എച്ച് ഡി പോലുള്ള ഇത്തരം ഉയർന്ന ബിരുദങ്ങൾ തന്നെ വേണം; ഇല്ലെങ്കിൽ സാധാരണക്കാർ ഇത് വല്ല അസഭ്യവുമാണെന്ന് തെറ്റിദ്ധരിച്ചു കളയും!

​യഥാർത്ഥത്തിൽ, ഈ കുഞ്ഞുപിള്ളേരുടെ കൈയിൽ ഇത്തരം അക്ഷരങ്ങൾ വരച്ചുനൽകിയ ഗുരുവിനെ ആയിരിക്കണംനല്ല നമസ്കാരം പറഞ്ഞു ആദരിക്കേണ്ടത്. കുട്ടികൾക്ക് കളിക്കാനും പഠിക്കാനും സമയം കൊടുക്കുന്നതിന് പകരം അവരെക്കൊണ്ട് ഇത്തരം പ്ലക്കാർഡുകൾ പിടിപ്പിച്ച് രസിപ്പിക്കുന്ന രാഷ്ട്രീയ തരികിടകളെയാകണം തിരഞ്ഞുപിടിച്ച് ശിക്ഷിക്കേണ്ടത് 

ചിന്ത ജെറോമിന്റെ ഈ ന്യായീകരണ ശൈലി  നോക്കിയാൽ, ഭാവിയിൽ സ്കൂളുകളിലെ സഭ്യതയും വ്യാകരണവും അളക്കാൻ പ്രത്യേക അക്കാദമിക് പാനൽ തന്നെ രൂപീകരിക്കേണ്ടി വരുമെന്ന കാര്യം ഉറപ്പാണ്!

-കെ എ സോളമൻ