ആയിരത്തോളം സ്ഥാപനങ്ങളില്‍ പരിശോധന
ആലപ്പുഴ: സെയ്ഫ് കേരളയുടെ ഭാഗമായി ആരോഗ്യവകുപ്പിന്റെ ഓണം റെയ്ഡ്. ഹോട്ടലുകള്‍, കൂള്‍ബാറുകള്‍, ബേക്കറികള്‍, കാറ്ററിങ് കേന്ദ്രങ്ങള്‍, സോഡ നിര്‍മാണ യൂണിറ്റുകള്‍, ഐസ് പ്ലാന്റുകള്‍, സൂപ്പര്‍ മാര്‍ക്കറ്റുകള്‍ എന്നിവയുള്‍പ്പെടെ 992 സ്ഥാപനങ്ങളിലായിരുന്നു ശനിയാഴ്ചത്തെ പരിശോധന.
വൃത്തിയില്ലാതെ ഭക്ഷണമുണ്ടാക്കുകയും വിതരണം ചെയ്യുകയുംചെയ്ത 132 സ്ഥാപനങ്ങള്‍ക്ക് നോട്ടീസ് നല്‍കി. 71 ഹോട്ടലുകള്‍, 21 കൂള്‍ബാറുകള്‍, 20 ബേക്കറികള്‍, ഒരു കാറ്ററിങ് കേന്ദ്രം, ഒരു സോഡാനിര്‍മാണ കേന്ദ്രം, 18 മറ്റുസ്ഥാപനങ്ങള്‍ എന്നിവയ്ക്കാണ് നോട്ടീസ് നല്‍കിയത്. വൃത്തിയുള്ള സാഹചര്യത്തില്‍ ഭക്ഷണവിതരണം നടത്താന്‍ സംവിധാനമൊരുക്കിയില്ലെങ്കില്‍ ശക്തമായ നടപടിയെടുക്കാനാണ് പരിപാടി.
ഓണക്കാലത്ത് ഹോട്ടലുകളിലൂടെയും മറ്റും വൃത്തിയില്ലാതെ ഭക്ഷണം വിതരണം ചെയ്യുന്നത് തടയാന്‍ ലക്ഷ്യമിട്ടായിരുന്നു പരിശോധന. ജില്ലാ മെഡിക്കല്‍ ഓഫീസര്‍ ഡോ.ഡി. വസന്തദാസിന്റെ നേതൃത്വത്തില്‍ 74 ടീമുകളാണ് പരിശോധനയ്ക്കുണ്ടായിരുന്നത്. മാന്നാറിലുള്ള ഒരു ഹോട്ടല്‍ പൂട്ടിച്ചു.
കഴിഞ്ഞയാഴ്ച നടത്തിയ പരിശോധനയില്‍ നോട്ടീസ് നല്‍കിയ 90 ശതമാനം സ്ഥാപനങ്ങളും വൃത്തിയുള്ള സാഹചര്യം സൃഷ്ടിച്ചിട്ടുണ്ട്. 10 ശതമാനം സ്ഥാപനങ്ങള്‍ക്ക് സമയം നീട്ടി നല്‍കിയിട്ടുണ്ട്. ഇനിയും അനാരോഗ്യകരമായ സാഹചര്യവുമായി മുന്നോട്ടുപോയാല്‍ പൊതുജനാരോഗ്യ നിയമപ്രകാരം കേസെടുക്കുകയും പിഴ ചുമത്തുകയും ചെയ്യാനാണ് ആരോഗ്യവകുപ്പിന്റെ പരിപാടി.
കമന്‍റ്: സെയ്ഫ് കേരള ഹോട്ടലുകള്‍ക്ക് മാത്രമാണോ ബാധകം? തെരുവു മലീമസമാക്കി മല്‍സ്യ വ്യാപാരം നടത്തുന്നവരെ എന്തികൊണ്ടാണ് ആരോഗ്യവകുപ്പ് കാണാതെ പോകുന്നത്. മീന്‍ വെള്ളം കെട്ടിനിന്നു വൃത്തികേടായ റോഡിലൂടെ നടക്കാന്‍ പറ്റാത്ത സാഹചര്യമുണ്ടായിട്ടും ഒരു സെയ്ഫ് കേരള്ക്കാളരനും കാണുന്നില്ല. മീന്‍ കച്ചവടം മൂലം തെരുവ് നായ്ക്കളുടെ ശല്യവും വഴികളില്‍ രൂക്ഷം. നായ്ക്കല്‍ കടിച്ചാല്‍ ഉണ്ടാകുന്ന പേ വിഷ ബാധ ആരോഗ്യപ്രശ്നമല്ലെന്നാണോ ആരോഗ്യ്വകുപ്പ് കരുതുന്നത്.ജനങ്ങളുടെ പൊതുവായ ആരോഗ്യമാണ് ലക്ഷ്യമെങ്കില്‍ ഹോട്ടലുകള്‍ വൃത്തിയാക്കുന്നതിനൊപ്പം തെരുവും വൃത്തിയാക്കുക. മുന്പ് നിലവിലുണ്ടായിരുന്ന രീതിയില്‍ മാര്‍ക്കറ്റുകള്‍ ഒരുക്കി മല്‍സ്യ വ്യാപരികളെ അങ്ങോട്ട് മാറ്റി കുടിയിരുത്തുക. തെരുവുകള്‍ വൃത്തിയായി കിടക്കട്ടെ.
-കെ എ സോളമന്‍
