വ്യാജരേഖകൾ കണ്ടെത്താം

#വ്യാജരേഖകൾ കണ്ടെത്താം

വ്യാജ രേഖകൾ ഇപ്പോൾ കേരളത്തിൽ പ്രചരിക്കുന്നുണ്ട് എന്ന കാര്യത്തിൽ  ആർക്കും തർക്കം ഉണ്ടാകാൻ ഇടയില്ല. മഹാത്മാഗാന്ധി സർവ്വകലാശാലയിൽ ഡിഗ്രി സർട്ടിഫിക്കറ്റ് ഫോർമാറ്റ് ബുക്ക് നഷ്ടപ്പെട്ടത് വ്യാജ സർട്ടിഫിക്കറ്റുകളായി പ്രത്യക്ഷപ്പെപെടാനുള്ള സാധ്യത തള്ളിക്കളയാൻ ആവില്ല.  തന്റെ എല്ലാ രേഖകളും ഒറിജിനൽ ആണെന്നും ഒന്നു പോലും വ്യാജമല്ലെന്നും യുവ ഗവേഷക കെ. വിദ്യ പറയുമ്പോൾ റിപ്പോർട്ടുകൾ  മറിച്ചാണ് കാര്യങ്ങൾ ചൂണ്ടിക്കാണിക്കുന്നത്

എംഎസ്എം കോളേജിലെ നിഖിൽ തോമസിന് വ്യാജ കലിംഗ സർട്ടിഫിക്കറ്റ് നൽകിയതിന് സിപിഎം പ്രവർത്തകനെ പൊലീസ് അറസ്റ്റ് ചെയ്തിട്ടുണ്ട്.  പക്ഷെ വസ്തുതകൾ മനസ്സിലാക്കാൻ രണ്ടംഗ കേരള പോലീസ് സംഘത്തിന് റായ്പൂരിലെ കലിംഗ സർവകലാശാല സന്ദർശിക്കേണ്ടിവന്നു. സാങ്കേതിക വിപ്ലവത്തിന്റെ കാലത്ത് ഇത്തരത്തിലുള്ള ഉല്ലാസയാത്രയും മറ്റ് രസകരമായ പ്രവ്യത്തികളും എന്തിനാണെന്ന് അത്ഭുതപ്പെട്ടു പോകുന്നു.

രാജ്യത്തെ സർവ്വകലാശാലകൾ അവരുടെ സർട്ടിഫിക്കറ്റുകളിൽ ക്യുആർ കോഡോ ഹോളോഗ്രാമോ ഉപയോഗിക്കാൻ തീരുമാനിച്ചാൽ, ഇത്തരത്തിലുള്ള കള്ള ഇടപാടുകൾ ഒഴിവാക്കാം. സ്‌മാർട്ട്‌ഫോൺ അല്ലെങ്കിൽ ടാബ്‌ലെറ്റ് വഴി ഓൺലൈനിൽ വിവരങ്ങൾ എളുപ്പത്തിൽ ലഭ്യമാക്കുന്നതിന് സർട്ടിഫിക്കറ്റുകളിലെ  ക്യുആർ കോഡ് ഉപയോഗിക്കാം. 

 ഉദ്യോഗാർത്ഥി ഹാജരാക്കിയ സർട്ടിഫിക്കറ്റിന്റെ ആധികാരികത തത്സമയം പരിശോധിക്കാൻ സർട്ടിഫിക്കറ്റിലെ ഹോളോഗ്രാം ഒരു കോളേജ് പ്രിൻസിപ്പലിനെ , തൊഴിലുടമയെ സഹായിക്കുന്നു.

കെ.എ. സോളമൻ