വ്യാജ പരാതികളുടെ രാഷ്ട്രീയം

#വ്യാജപരാതികളുടെ #രാഷ്ട്രീയം.

സ്വാർത്ഥരായ നിരവധി രാഷ്ട്രീയ പ്രവർത്തകർ, യഥാർത്ഥ വോട്ടർമാരെ പട്ടികയിൽ നിന്ന് നീക്കം ചെയ്യുന്നതിനായി തിരഞ്ഞെടുപ്പ് ഉദ്യോഗസ്ഥന് വ്യാജ പരാതികൾ നൽകുന്നു. തെരഞ്ഞെടുപ്പു സംവിധാനത്തെ ദുരുപയോഗം ചെയ്യുക എന്നതാണ് ഇതിൻ്റെ ലക്ഷ്യം. യാതൊരു തെളിവുമില്ലാതെയാണ് അവർ ഇത് ചെയ്യുന്നത്. രാഷ്ട്രീയ എതിരാളികളെ ബുദ്ധിമുട്ടിക്കുക എന്നതാണ് മുഖ്യോദ്ദേശ്യം. 

ഇത് ഒരു തരം ക്രൂരമായ പ്രവൃത്തിയാണ്, കാരണം നിരപരാധിയായ വോട്ടർക്ക് തന്റെ അവകാശം തെളിയിക്കാൻ ഒരു ദിവസത്തെ ജോലി നഷ്ടപ്പെടുത്തി  ഹിയറിംഗിനായി പങ്കെടുക്കണം. ഇത് കണ്ട് ആസ്വദിക്കുന്ന  പരാതിക്കാരന് ഒരു പ്രയാസവും നേരിടേണ്ടിവരില്ല,  വോട്ടറാകട്ടെ പീഡനവും മാനസിക സമ്മർദ്ദവും അനുഭവിക്കുന്നു. 

ഇത്തരം കുതന്ത്രങ്ങൾ ജനാധിപത്യത്തിനെതിരായ വ്യക്തമായ ആക്രമണമാണ്. ന്യായമായ രീതിയിൽ വോട്ട് നേടാൻ കഴിയാത്തവരുടെ വിലകുറഞ്ഞ മാനസികാവസ്ഥയെ ഇത് സൂചിപ്പിക്കുന്നു.

ഈ അനീതി ഉടനടി അവസാനിപ്പിക്കണം. യഥാർത്ഥ വോട്ടർക്കെതിരെ ആരെങ്കിലും തെറ്റായ പരാതി നൽകിയാൽ, അവർക്കെതിരെ കർശനമായ ക്രിമിനൽ നടപടി സ്വീകരിക്കണം.  മറ്റുള്ളവർ സംവിധാനം ദുരുപയോഗം ചെയ്യാതിരിക്കാൻ വ്യാജ പരാതിക്കാരെ  ശിക്ഷിക്കണം. തിരഞ്ഞെടുപ്പ് ഉദ്യോഗസ്ഥൻ പരാതികളെ മാത്രം ആശ്രയിക്കരുത്, മറിച്ച് വോട്ടർമാരുടെ വസതിയിൽ എത്തി  വ്യക്തിപരമായി പരിശോധിക്കണം.

ഇരട്ടവോട്ട് തടയുകയാണ്  ഉദ്ദേശമെങ്കിൽ  ഇരുട്ടവോട്ടിന് തെളിവ് ഹാജരാക്കാൻ വ്യാജ പരാതിക്കാരോട് ഇലക്ഷൻ ഓഫീസർ ആവശ്യപ്പെടണം. അതോടൊപ്പം ഇണ്ടലിബിൾ ഇങ്ക് വോട്ടറുടെ വിരലിൽ പൂശുന്നതിനെക്കുറിച്ച് പുനർചിന്തനവും നടത്തണം

ഒരു വ്യക്തിയുടെ വോട്ടവകാശം പവിത്രമാണ്, അത് ഉപയോഗിച്ച് വൃത്തികെട്ട രാഷ്ട്രീയം കളിക്കാൻ ആരെയും അനുവദിക്കരുത്. വ്യാജ പരാതികളിലൂടെ പൗരന്മാരുടെ ജനാധിപത്യ അവകാശങ്ങൾ തകർക്കാൻ  ശ്രമിക്കുന്നവർ ജനങ്ങളുടെ ശത്രുക്കളാണ്.  ഇത്തരം നിയമലംഘകരെ തിരക്കുനിർത്തണം അവർക്കെതിരെ നടപടി സ്വീകരിക്കണം

 -കെ. എ. സോളമൻ