വികലമായ നയം

#വികലമായ നയം

അനുഭവസമ്പത്തും വൈദഗ്ധ്യവും പ്രയോജനപ്പെടുത്താനെന്ന വ്യാജേന കേരള സർക്കാർ വിരമിച്ചവരെ വീണ്ടും നിയമിക്കുന്നത് യുവതലമുറയുടെ വളർച്ചയെയും അവസരങ്ങളെയും തടയുന്ന അതിവികലമായ നയമാണ്. വിരമിച്ചവരെ തുടർച്ചയായി വീണ്ടും നിയമിക്കുന്നതിലൂടെ, കഴിവുള്ള, വിദ്യാസമ്പന്നരും, വൈദഗ്ധ്യവുമുള്ള ആയിരക്കണക്കിന് യുവാക്കൾക്ക് സർക്കാർ തൊഴിൽ അവസരങ്ങൾ നിഷേധിക്കുകയാണ്. 

ഈ സമ്പ്രദായം പുതിയ പ്രതിഭകൾക്ക് തൊഴിൽ മേഖലയിൽ പ്രവേശിക്കുന്നതിന്  തടസ്സം സൃഷ്ടിക്കുന്നു, യുവമനസ്സുകളിൽ നിന്ന് ഉണ്ടാകേണ്ട നവീകരണവും പുരോഗമന ചിന്തയും പരിമിതമാക്കുന്നു. ചെറുപ്പക്കാരായ വ്യക്തികൾ സമൂഹത്തിൻ്റെ മറ്റ് മേഖലകളിൽ പ്രധാന പങ്ക് വഹിക്കുന്നത് സ്വാഭാവികമായതുപോലെ, അവർക്ക് തൊഴിൽ ശക്തിയിലും നേതൃത്വം നൽകാനും സംഭാവന നൽകാനും കഴിയും, അതിനവർക്ക് അവസരം നൽകണം. 

അനുഭവസമ്പന്നതയാണ് പുനർ നിയമത്തിന് കാരണം എങ്കിൽ പ്രസവിച്ച സ്ത്രീകൾ തന്നെ വീണ്ടും പ്രസവിച്ചാൽ മതി, ചെറുപ്പക്കാരികൾ അതേക്കുറിച്ച് ആലോചിക്കേണ്ട  എന്ന് പറഞ്ഞാൽ പോരെ?

കാലഹരണപ്പെട്ട അനുഭവ സങ്കൽപ്പങ്ങൾ മുറുകെ പിടിക്കുന്നതിലൂടെ, ഭാവി തലമുറയുടെ തൊഴിൽ സാധ്യതകൾ ഇല്ലാതാക്കുകയും അവരുടെ സാമ്പത്തിക സ്ഥിരതയെ തുരങ്കം വെക്കുകയും സംസ്ഥാനത്തിൻ്റെ മൊത്തത്തിലുള്ള വളർച്ചയെ തടസ്സപ്പെടുത്തുകയും ചെയ്യുന്നു. ഉയർന്ന തസ്തികയിൽ നടന്നിരുന്ന പുനർ നിയമനങ്ങൾ ഇപ്പോൾ ക്ളറിക്കൽ തലങ്ങളിലും വ്യാപിച്ചിരിക്കുന്നു. "ചെങ്കൊടിക്ക് കവലാൾ " ഫെയിം ചിത്രസേനൻ്റെ പുനർനിയമനം ഉദാഹരണം.

 രാഷ്ട്രീയ നേട്ടത്തിനും അഴിമതിക്കും വേണ്ടി അന്യായമായ പ്രീണന സമ്പ്രദായം നിലനിർത്തുകയാണ് സർക്കാർ ചെയ്യുന്നത്. തങ്ങളുടെ അവസരം നഷ്ടപ്പെടുകയാണെന്ന് അറിയാമെങ്കിലും വിരമിക്കാത്തവർ ഇതിനെ എതിർക്കാത്തത് റിട്ടയർമെൻറിനുശേഷം പുതിയ ലാവണങ്ങൾ  തടയും എന്ന ചിന്തയിലാണ്. ഭരണകക്ഷിയോട് ചേർന്ന് നിന്ന് പ്രവർത്തിക്കാൻ ഇത് ജീവനക്കാരെ പ്രേരിപ്പിക്കുന്നു

-കെ എ സോളമൻ